ԼՂՀ ԱԺ արտաքին հարաբերությունների հանձնաժողովի նախկին նախագահ Վահրամ Աթանեսյանը՝ անդրադառնալով վերջին շրջանում հայ-ադրբեջանական սահմանում լարված իրավիճակին, «Առավոտի» հետ զրույցում նշել է այս պայմաններում մամուլի դերը։
«Մամուլը պետք է լինի Հայաստանի եւ Արցախի վարչապետների կողքին՝ Տավուշի խրամատներում, որպեսզի սահմանային լարվածությունից խոսելու իրավունք ունենա։ Մամուլը պետք է կարողանա լռել, եթե դա է պահանջում հայրենիքի շահը։ Իշխանությունը պետք է ունենա մամուլին լռեցնելու բարոյական իրավունք, որովհետեւ նա երկրի, պետության իշխանությունն է, պետք է այդպիսին լինի»։
Չափազանց վտանգավոր տեսակետ է հայտնել արցախցի գործիչը։ Ուղղակի նշենք, որ պատերազմական կամ ծանր իրավիճակներում մամուլը պետք է ոչ թե լռի, այլ՝ օգնի։ Բայց դրա համար իշխանությունները պետք է նախաձեռնության ցուցաբերեն։
1990-ականների արցախյան պատերազմի տարիներին իշխանությունները պարբերաբար հանդիպումներ էին կազմակերպում լրատվամիջոցների ղեկավարների հետ, որոնց ընթացքում ներկայացնում էին, թե պատերազմի հետ կապված ռազմական կամ քաղաքական կոնկրետ իրադարձությունը ինչպես պետք է լուսաբանվի։ Չէին պահանջում, այլ լրագրողների հետ քննարկում էին, խորհուրդներ տալիս։ Դա բավական արդյունավետ համագործակցություն էր, որը բխում էր պետության շահերից։ Անշուշտ, ընդդիմադիր մամուլը շարունակում էր քննադատել իշխանություններին, սակայն դրա հետ մեկտեղ չէր խորշում առաջնորդվել իշխանության ցուցումներով։
Կարդացեք նաև
Ոչ ոք այս իշխանություններին չի խանգարում, որպեսզի նմանատիպ հանդիպումներ կազմակերպի լրատվամիջոցների հետ, նրանց հուշի, թե ինչպես լուսաբանեն հակամարտության ընթացքում ծագած տարբեր իրադարձությունները։ Դրանով նրանք մամուլին ե՛ւ օգնած կլինեն, ե՛ւ մամուլը ինքը պարտավորված կզգա հաշվի առնել երկրի շահերը եւ խուսափել ոչ ցանկալի հրապարակումներից։
Մհեր ՂԱԼԵՉՅԱՆ
Հոդվածն ամբողջությամբ կարող եք կարդալ «Չորրորդ իշխանություն» թերթի այսօրվա համարում
