ԲՀԿ մամուլի քարտուղար Վահան Բաբայանը «Պոստ սկրիպտում» մամուլի ակումբում պատասխանելով Aravot.am-ի այն դիտարկմանը, թե եռյակի իրենց նախկին գործընկերները հիասթափված են սահմանադրական փոփոխությունների վերաբերյալ ԲՀԿ-ի՝ տրամագծորեն հակառակ դիրքորոշումից, օրինակ՝ Րաֆֆի Հովհաննիսյանն էր փոքր-ինչ նեղսրտած, ասաց. «Չգիտեմ, ով ինչից է նեղված, ով է նեղված ով՝ ոչ, բայց ԲՀԿ-ն իր քաղաքական օրակարգն ինքն է որոշում»:
Պարոն Բաբայանը տեղեկացրեց, որ իրենց տարածքային կառույցներում քննարկումներ են ընթանում այդ հարցով և վերջնական որոշումը կլինի միայն դրանց ավարտին:
Այնուհետև նշեց. «Մինչև քվեարկություն հանդես կգանք հայտարարությամբ, թե ԲՀԿ-ի ընդհանուր դիրքորոշումը որն է սահմանադրական բարեփոխումների հարցով»:
Այն հարցին՝ ի՞նչ փոխվեց, որ իրենց դիրքորոշումը փոխվեց, և Միքայել Մելքումյանն էլ հայտարարել էր, որ իրենց դիրքորոշումը մեղմվել է, Վահան Բաբայանը պատասխանեց. «Այն ժամանակ մենք նայում էինք, որ կար երկու բևեռների առճակատման խնդիր ու երկրում այլ քաղաքական իրավիճակ էր տիրում: Այդ ժամանակ մենք ասել ենք, որ սահմանադրական բարեփոխումների գնալն այդ պահին ժամանակավրեպ է: Հայտնի իրադարձությունից հետո իրավիճակ է փոխվել»:
Կարդացեք նաև
Հետաքրքրվեցինք՝ ի՞նչ հայտնի իրադարձության մասին է խոսքը, Գագիկ Ծառուկյանի հետ կատարվա՞ծը, պարոն Բաբայանը փոքր-ինչ դժկամորեն պատասխանեց. «Այն իրադարձություններն են, որոնց հետևանքով քաղաքական առճակատումն ավարտվեց»:
Հարցին՝ իշխանությունները պատրաստակա՞մ են իրենց առաջարկները հաշվի առնել, պարոն Բաբայանը պատասխանեց. «Ժողովրդավարության ամրապնդմանը նպաստող առաջարկները հնարավոր չէ չընդունվեն, մեր ծանրակշիռ կարծիքը ներկայացվել է: Ի վերջո, ոչ մեկի համար սահմանադրությունը վատը դարձնել չի կարող ձեռնտու լինել»:
Վահան Բաբայանը նաև կոչ արեց քաղաքական ուժերին «բոլորն ապրեն իրենց կյանքով և կեղտոտ փիառ չօգտագործեն իրար նկատմամբ, քանի որ ցեխ շպրտել այլ կուսակցությունների հասցեին դա պատիվ չբերող մոտեցում է, որը միշտ ավարտվել է անփառունակ կերպով»:
Տաթև ՀԱՐՈՒԹՅՈՒՆՅԱՆ
