«Ոտքի Հայաստան» շարժման խորհրդի անդամ Անդրիաս Ղուկասյանը այսօր Հանրապետության հրապարակում հանրահավաքի ժամանակ առաջ քաշեց Սերժ Սարգսյանին պաշտոնանկ անելու պահանջը:
«Արտահերթ նախագահական ընտրությունները կարող են կասեցնել սահմանադրական կարգի փոփոխությունների ընթացքը, որովհետեւ օրենքով հանրաքվեն կասեցվում է, եթե նախագահի պաշտոնը թափուր է: Սերժ Սարգսյանը հայտնեց իր դիրքորոշումը, որ պատրաստ է առաջ տանել սահմանադրական փոփոխությունները: Հիմա ժողովուրդը պետք է կատարի իր քայլն ու արձագանքի այդ երեւույթին: Մեր կարծիքով, ժողովրդի ճիշտ քայլը իմպիչմենտի պահանջն է»,- ասաց Անդրիաս Ղուկասյանը:
Նրա խոսքով, ժողովուրդն ունի իրավունք հեռացնել այս կառավարությանը, որովհետեւ այն իշխանության է եկել անօրինական ճանապարհով, որովհետեւ օգտագործում է պետական իշխանությունն իր անձնական, անօրինակ հարստությունը ստեղծելու համար, որովհետեւ այն գործում է ժողովրդի ազգային շահերի դեմ. «Որպես կանոն, մարդիկ հանդուրժում են անօրինականությունները, նույնիսկ բռնապետությանը, բայց գալիս է ժամանակ, որ հանդուրժել նշանակում է վտանգել սեփական կյանքը, սեփական ընտանիքն ու սեփական շահերը: Մեր ժողովուրդը հասել է այդ իրավիճակին: Իշխող կուսակցությունը առաջ է քաշել սահմանադրական կարգի փոփոխության նախագիծ, որի գլխավոր էությունը ժողովրդից իր ընտրական իրավունքի ամբողջ տիրույթը խլելն է: Մեր ժողովուրդը ինքն է այսօր տիրապետում այդ իրավունքին, օգտվում է, իրացնում է այդ իրավունքը, թե՝ ոչ, դա այլ հարց է, բայց ինքը պետության ղեկավար ընտրելու իրավունք ունի: Նոր սահմանադրական կարգը վերացնում է այդ հնարավորությունը, եթե հիմա դրա դեմ քայլեր չձեռնարկենք, հետագայում հանրությունը կանգնելու է ավելի լուրջ խնդիրների առջեւ:
Դրա համար գտնում ենք, որ հիմա է ժամանակը իշխանափոխության գաղափարն առաջ բերելու»:
Կարդացեք նաև
Պարոն Ղուկասյանը կոչ արեց բոլոր քաղաքական ուժերին միանալ «ոչ»-ի պայքարին եւ հանդես գալ ժողովրդի վստահության կառավարության ձեւավորման նախաձեռնությամբ, մոբիլիզացնել ժողովրդին:
Արփինե ՍԻՄՈՆՅԱՆ
