ՀՀԿ-ականներն ասում են, որ նոր Սահմանադրությամբ ընդդիմությանը լծակներ են տրվում, օրինակ, ԱԺ փոխնախագահի պաշտոնը եւ զարմանում են, թե էլ ի՞նչ եք ուզում, ինչի՞ց եք դժգոհ: Այսօր լրագրողների այս հարցին ՀԱԿ խմբակցության ղեկավար Լեւոն Զուրաբյանը պատասխանեց. «Չհասկացա, այսինքն, իրենց պատկերացումներով իրենց կերակրամանից մեզ ինչ-որ փշուրներ են հա՞ հետաքրքրում: Իրենց պատկերացումը սա է՝ ընդունել այն ընդդիմությանը, որը իշխանությունից կստանա ինչ-որ փայաբաժին, բայց մեր նպատակը դա չի: Մենք ուզում ենք երկիրը վերափոխել, դարձնել երկիր, որտեղ մենաշնորհացում չկա, ազատ մրցակցություն կա: Մենք սա ենք ուզում, դրա համար մենք պիտի գանք իշխանության: Հենց որ դու սկսում ես այդ «թուլափայով» բավարարվել, դու դառնում ես ընդամենը այդ ռեժիմի մաս, դառնում ես նրա աջակից, նրա հաճախորդ, ինչ ուզում եք՝ անունը դրեք: Դու արդեն խնդիր չես դնում այս ռեժիմից ազատվելու»:
Նա ասաց, որ ավելի լավ է իրենք ձախողվեն եւ մյուս ընտրություններում ոչ էլ խորհրդարան մտնեն, բայց որպես ընդդիմություն, իրենց պարտականությունը կատարեն, քան այդ գնով գնան պառլամենտ. «Հիմա շատերը գնում են հենց այդ բազարի: Նրանք հիմա իշխանության հետ համագործակցում են՝ շատ լավ հասկանալով իշխանության նպատակները՝ հենց միայն այդ հույսով, որ մեկ կամ երկու մանդատ պոկեն ապագա պառլամենտում: Սա է նրանց ամբողջ մոտեցումը»:
Հռիփսիմե ՋԵԲԵՋՅԱՆ
