Արաբկիր և Քանաքեռ-Զեյթուն ընդհանուր իրավասության դատարանում այսօր շարունակվեց գործարար Փայլակ Հայրապետյանի դեմ հայցով դատական գործի քննությունը:
Հայցվորի ներկայացուցիչ Գևորգ Հակոբյանը միջնորդություն էր ներկայացրել, որ «Շամշյան մեդիա» ՍՊԸ-ին ներգրավեն որպես երրորդ կողմ, իսկ պատասխանողի ներկայացուցիչ Գրիշա Բալասանյանը պնդեց, որ պետք է կամ Փայլակ Հայրապետյանին ճանաչել անպատշաճ պատասխանող և փոխարինել «Շամշյան մեդիա» ՍՊԸ-ով, կամ այդ ՍՊԸ-ին ներգրավել որպես երկրորդ պատասխանող ու մանրամասնեց. «Որպես պատասխանող՝ հայցը պետք է ուղղված լիներ «Շամշյան մեդիա» ՍՊԸ-ի դեմ, քանի որ այդ ԶԼՄ-ում է ներկայացվել Փայլակ Հայրապետյանի խոսքը: Պետք է ապացուցել՝ արդյոք այդ լրատվամիջոցը բառացի և բարեխիղճ վերարտադրե՞լ է Փայլակ Հայրապետյանի խոսքը, այնուհետև նաև Փայլակ Հայրապետյանին ներգրավել որպես պատասխանող»:
Գրիշա Բալասանյանը կասկածի տակ է դնում՝ արդյոք ընդհանրապես տվյալ ԶԼՄ-ի լրագրողը խոսե՞լ է Փայլակ Հայրապետյանի հետ, թե՞ ոչ, քանի որ Հայրապետյանը չի հիշում, որ տվյալ լրատվամիջոցին հարցազրույց տված լինի:
Գրիշա Բալասանյանը պնդեց. «Նա երբևէ չի ասել իր նախորդ հարցազրույցներում, որ Տիգրան Սարգսյանը մասնակցել է խորհրդակցությանը»:
Կարդացեք նաև
Ներկայացված միջնորդությանը հայցվորի ներկայացուցիչը դեմ արտահայտվեց:
Այնուամենայնիվ, դատարանը գտավ, որ «ելնելով գործի առանձնահատկություններից և հիմք ընդունելով քաղաքացիական օրենսգրքի համապատասխան դրույթը՝ «Շամշյան մեդիա» ՍՊԸ-ն պետք է այս գործով ներգրավի երկրորդ պատասխանողի կարգավիճակով: Այս որոշումը պայմանավորված է նրանով, որ դատարանը դեռ պետք է ապացուցման բեռ բաշխի, որը «Շամշյան մեդիա» ՍՊԸ-ի՝ երրորդ անձի կարգավիճակում կարող է խափանվել:
Դատական նիստը հետաձգվեց: Հաջորդ դատական նիստը նշանակվեց հոկտեմբերի 12-ին, ժամը 14.00-ին:
Տաթև ՀԱՐՈՒԹՅՈՒՆՅԱՆ
