«Ժառանգություն» կուսակցության նախագահ Րաֆֆի Հովհաննիսյանը չի դատում ժամանակին եռյակի ներսում իր գործընկերներին՝ սահմանադրական փոփոխությունների հարցում դիրքորոշում փոխելու համար: Նա այս առիթով նշեց. «Քաղաքական կյանք է, դիրքորոշումները մեկ-մեկ փոխվում են քաղաքական իրավիճակի հետ: Ինչպես Սերժ Սարգսյանի հետ հանդիպելու ու ձեռք սեղմելու պարագայում, նույն կերպ չեմ դատապարտում, և ընդունում եմ ի գիտություն այդ փոփոխությունը: Բայց նաև տեսնում եմ, որ ընդամենն այս տարվա սկիզբն էր՝ ամիսներ առաջ, երբ միասնական պայքար և կոնկրետ դիրքորոշում կար այս հարցում: Ոմանց մոտ փոխվում է, ոմանց մոտ նույնն է մնում»:
Պարոն Հովհաննիսյանի կարծիքով՝ պետք է կոնսոլիդացիայի արդյունքում ժամանակավոր իշխանություն ստեղծվի, որը կկարողանա այս քսան տարվա ընթացքում ապահովել արդար ու թափանցիկ ընտրություններ:
Հարցին՝ «Ժառանգությունում» արդյոք կարգապահական խնդիրները չառաջացա՞ն իր՝ Սերժ Սարգսյանի ձեռքը սեղմելուց հետո, պարոն Հովհաննիսյանն ասաց. «Կարգապահական խնդիր՝ որպես այդպիսին «Ժառանգությունը» միշտ ունեցել է, և բոլոր կուսակցություններն ունեն: Մեր տարբերությունն այն է, որ մերը հասարակության աչքի առաջ է, մենք բացախոս ենք ու ներկայացնում ենք մեր մոտեցումները: Մենք եղել ենք ազատ խոսող ու ազատ քաղաքացիներից բաղկացած մի կուսակցություն: Իսկ ձեռք սեղմելու այս ծածկագիրը այնքան էլ աղերս չունի իշխանության հետ: Ես որ գնացի նախագահի նստավայր, գնացի լրիվ այլ կարգավիճակով ու այլ խնդրով, որ կարողանանք հաղթահարել հետընտրական ճգնաժամը, իշխանությունը վերադարձնել ժողովրդին: Ես շատ մարդկանց ձեռք եմ սեղմել»:
Տաթև ՀԱՐՈՒԹՅՈՒՆՅԱՆ
