«1995 թվականի Սահմանադրությունը անձնակենտրոն, իշխանակենտրոն էր`առանցքը նախագահն էր, իր ազդեցությամբ բոլորի վրա: 2005 թվականի փոփոխությունները Սահմանադրությունը մարդակենտրոն չդարձրին»,- այսօր, խորհրդարանում, սահմանադրական բարեփոխումների նախագծի շուրջ ԱԺ պետաիրավական հանձնաժողովի կազմակերպած լսումների ժամանակ ասաց սահմանադրական բարեփոխումների մասնագիտական հանձնաժողովի անդամ, հիմնական զեկուցող Վարդան Պողոսյանը:
Ներկայացնելով սահմանադրական բարեփոխումների անհրաժեշտությունը եւ առաջարկվող նախագծի առավելությունները, հիմնական զեկուցողն ասաց. «Այս նախագծի հիմնական նպատակն է երկրում կայուն ժողովրդավարական համակարգի եւ իրավունքի գերակայության սկզբունքի ապահովումը»:
Լսումների արդյունքում, մասնագիտական հանձնաժողովն ակնկալում է լսել հավաքվածների կարծիքները, որպեսզի «ունենանք ավելի կատարելագործված սահմանադրություն»: Համենայնդեպս, այդպես հայտարարեց Վարդան Պողոսյանը:
Նա մանրամասն ներկայացրեց հանձնաժողովի կատարած աշխատանքը`ասելով, որ համակողմանի ուսումնասիրել են համաշխարհային փորձը, փորձել են հաղթահարել այն բացերն ու անհստակությունները, որոնք կան գործող Սահմանադրության մեջ:
Կարդացեք նաև
Մինչ այժմ տեղի ունեցած հանդիպումների ու քննարկումների արդյունքում եղել են բազմաթիվ առաջարկներ, որոնց մի մասն ընդունվել է: «Նախագիծը չենք դիտարկում որպես դոգմա, հիմնական փաստաթուղթ, պատրաստ ենք ողջամիտ քննարկումների»,- հավելեց բանախոսը`ընդգծելով, որ այս նախագիծը պետք է ընդունվի փոխվստահության մթնոլորտում, պետք է ապահովվի լայն կոնսոլիդացիան`նախագծի շուրջ:
Նելլի ԳՐԻԳՈՐՅԱՆ
