Էդուարդ Շարմազանովի կարծիքով՝ ԳՄ անդամների վերաբերմունքը դրական է
Հանրապետական կուսակցությունը սեպտեմբերի 3-ին ԳՄ նիստ էր գումարել: Չնայած, որ ԱԺ պատգամավոր Արփինե Հովհաննիսյանը ՀՀԿ Գործադիր մարմնի անդամ չէ, նա մասնակցել է ՀՀԿ ԳՄ նիստին:
Նիստի ավարտից հետո Էդուարդ Շարմազանովը լրագրողների հետ զրույցում ասաց, որ քննարկվել է արդարադատության նախարարի պաշտոնում Արփինե Հովհաննիսյանի թեկնածությունը:
Նա նշեց, որ նախագահը խորհրդակցել է Գործադիր մարմնի անդամների հետ, եւ պետք է որոշումներ կայացնի: Ըստ նրա՝ ԳՄ անդամների վերաբերմունքը հիմնականում դրական է. «ԳՄ անդամները դրական են գնահատում Արփինե Հովհաննիսյանի փորձը, պարոն նախագահը իր որոշումը կկայացնի»:
Կարդացեք նաև
Հարցին, թե այսինքն՝ կարելի է բացառե՞լ Արթուր Օսիկյանի թեկնածությունը, Էդուարդ Շարմազանովը պատասխանեց, որ քննարկվել է միայն Արփինե Հովհաննիսյանի թեկնածությունը. «Դուք մարդկանց անունը գցում եք շրջանառության մեջ, հետո մեզնից պահանջում եք կա՛մ հերքել, կա՛մ հաստատել»:
Ամի ՉԻՉԱԿՅԱՆ
