Այսօր՝ սեպտեմբերի 3-ին գեներալ-գնդապետ Գուրգեն Դալիբալթայանի հրաժեշտի արարողությունն էր Եռաբլուրի պանթեոնում:
Հուղարկավորության արարողության ժամանակ ներկայացվեց Հայկական բանակի կայացման մեծ նվիրյալի կենսագրությունը. «Նա կենդանի լեգենդ էր, որ թեեւ պատկառելի տարիքին, քառորդ դար ապրեց պատերազմի եւ ապա բանակաշինության ճանապարհներով, պատերազմի դաշտում, թե զորավարժարաններում մեզ հետ կիսեց հաջողությունների ուրախությունը, դարձավ մեր հաղթանակների ճարտարապետներից մեկը, իսկ դժվարին պահին հուշեց անհաջողությունները հաղթահարելու ուղիները: Չկա մի կամավորական ջոկատ կամ մի զորամաս, որ ամենաջերմ հիշողությունը չպատմեն նրա մասին: Նա Արցախյան ազատամարտի առաջին կամավորականներից էր, Հայաստան եկած եւ պատերազմ մեկնած առաջին գեներալը, ՀՀ ԶՈՒ առաջին շտաբի պետը, նորանկախ Հայաստանի առաջին ռազմական գլխավոր տեսուչը ու մեր առաջին ուսուցիչներից մեկը:
ՊՆ նախարար Սեյրան Օհանյանն իր ելույթում ընդգծեց, որ հրաժեշտ են տալիս պետական, ռազմական բացառիկ ազնվության տեր անձնավորությանը, որի ամբողջ կյանքը նվիրված է եղել հայ ժողովրդին, մեր պետականության կերտմանը, Հայկական բանակի կազմավորմանը. « Մի քանի առանձնահատկություններ կան, որ կուզեի իմանար մեր հանրությունը նրա մասին: Նա բացառիկ պետական եւ ռազմական գործիչ էր: Կարող էր հրամանատարական իր կետը թողնել եւ զինվորի հետ առաջ գնալ՝ նույնիսկ շատ դեպքերում առանց զենքի՝ ապացուցելով իր անձնուրացությունն ու խիզախությունը:
Կարդացեք նաև
Այսօր Գուրգեն Հարությունիչը գնում է այնտեղ, որտեղից ծնվել է: Պետք է շաղախվի հայկական հողի հետ, որից նա ծնունդ է առել եւ իր ամբողջ կյանքում դժվարությունների, մաքառումների ճանապարհին ստեղծել այնպիսի դիրք, արժանապատվություն, որը գնահատանքի է արժանի ոչ միայն այսօր՝ հրաժեշտի պահին, այլ արժանի էր այն ժամանակ, երբ կենդանի էր: Գուրգեն Հարությունիչը ապացուցեց իր նվիրվածությունը հայրենիքին: Նա գնում է ամփոփվելու այն վայրում, որտեղ յուրաքանչյուր տարի ամփոփում ենք մեր մարտական ընկերներին, գնում է ամփոփելու այն զորավարների շարքը, որն այստեղ գլխավորում է մեր սպարապետը՝ Վազգեն Սարգսյանը:
Այսօր մայր հողին ենք հանձնում Գուրգեն Հարությունիչին, նրա մարմնի հանգստության համար ամենակարեւոր մեր պատասխանատվությունը կլինի այն, որ նրա տված գաղափարները, ցուցումները մեր այսօրվա գործունեության ընթացքում իրականացնենք: Գուրգեն Հարությունիչ, այդ հավիտենական կյանքում ապրելու վաստակը դուք ձեռք եք բերել ձեր կյանքի ընթացքում եւ այսօր կարող եք հանգիստ հանգչել մեր մարտական ընկերների կողքին՝ վստահ լինելով, որ այն, ինչ կիսատ եք թողել, կարողանալու ենք լրացնել: Հավերժ հիշատակ, Գուրգեն Հարությունիչ»:
Դարիբալթայանի աճյունն ամփոփվեց Անդրանիկ Օզանյանի շիրիմի կողքին:
Հռիփսիմե ՋԵԲԵՋՅԱՆ
