Սյունիքի մարզպետ Սուրիկ Խաչատրյանի օգնական, իր քրեական անցյալով հայտնի Զարզանդ Նիկողոսյանի՝ Կապանի թիվ 6 դպրոցի փոխտնօրեն նշանակվելը մեծ աղմուկ էր առաջացրել, ինչին հետեւեց ԿԳ նախարար Արմեն Աշոտյանի արձագանքը եւ հետագա քայլերը: Արմեն Աշոտյանն իր ֆեյսբուքյան էջում գրեց, որ Սյունիքի մարզպետարանի հետ հարցը քննարկելուց հետո որոշվել է չեղյալ հայտարարել փոխտնօրենի նշանակման մասին որոշումը:
Իր հերթին Սյունիքի մարզպետը հերքել էր, թե Զարզանդը պաշտոնանկ է արվել ԿԳ նախարարության միջամտությամբ, նույնիսկ ասել էր, որ ինքն է հրաման տվողն ու նշանակողը:
Եվ սա այն դեպքում, երբ դպրոցի տնօրենին ՀՀ կառավարության որոշմամբ հաստատված կարգի համաձայն՝ ընտրում է Կառավարման խորհուրդը, իսկ փոխտնօրենին նշանակում է հենց ինքը՝ տնօրենը:
Քանի որ կրթության ոլորտում ԿԳ նախարարության կրթության պետական տեսչությունն է, ի թիվս այլ հարցերի, նաեւ կրթության բնագավառի օրենսդրության միատեսակ և անկողմնակալ կիրառման ապահովման երաշխավորը, Aravot.am-ը ՀՀ ԿԳ նախարարության կրթության պետական տեսչության պետ Արամ Կարապետյանից հետաքրքրվեց՝ մի՞թե Սյունիքի մարզպետը օրենքով փոխտնօրեն նշանակելու լիազորություն ունի, ինչպես պնդում է:
Կարդացեք նաև
Պարոն Կարապետյանն ի պատասխան ասաց. «ՀՀ օրենսդրությամբ փոխտնօրենին նշանակում է գործատուն, տվյալ պարագայում՝ տնօրենը: Իսկ տնօրենները կարող են տեղյակ պահել իրենց վերադասին՝ կրթության վարչության պետին, պետն էլ՝ մարզպետին: Ինչ-ինչ սխալներով եւ ԽԾԲ-ներով նշանակված փոխտնօրենի հրամանը կարող է նրա վերադասը չեղյալ հայտարարել: Ի դեպ, Հայաստանի Հանրապետությունում դպրոցների տնօրենները երեք ենթակայություն ունեն՝ Երեւան քաղաքինը Երեւանի քաղաքապետն է, մարզերինը՝ մարզպետները, նաեւ ԿԳ նախարարության ենթակայության դպրոցներ ունենք: Բոլոր դեպքերում փոխտնօրենը, ի տարբերություն տնօրենի, որեւէ մրցույթի չի մասնակցում: Տնօրենի կողմից փոխտնօրեն նշանակելու իրավասությունը տրված է դպրոցի օրինակելի կանոնադրությամբ, որը հաստատում է ՀՀ կառավարությունը: Ամեն մի դպրոց ՀՀ կառավարության այդ որոշումը տեղայնացնում է իր դպրոցի «հագով» եւ տանում է իր գործատուին՝ հաստատելու: Տվյալ դեպքում երեքն են հաստատողները՝ մարզպետները, քաղաքապետը եւ ԿԳ նախարարը:
Ինչ վերաբերում է Զարզանդ Նիկողոսյանի՝ Կապանի թիվ 6 դպրոցի փոխտնօրեն նշանակելուն, նման հրաման չի էլ եղել, որ չեղյալ հայտարարվի»:
Արամ Կարապետյանը նորից շեշտեց, որ կառավարման խորհուրդը ընտրում է դպրոցի տնօրենին, նրա հետ պայմանագիր կնքում է մարզպետը, բայց տնօրենն առաջին հերթին հաշվետու է խորհրդին:
Գոհար ՀԱԿՈԲՅԱՆ
