«Լեռնային Ղարաբաղն արդեն գրեթե քառորդ դար ապրում է բավականին բարդ պայմաններում, սակայն փորձում է արդյունավետորեն պետական մոդել կառուցել, որը կհամապատասխանի այդ տարածաշրջանի պայմաններին եւ հաշվի կառնի այն հակամարտության յուրահատկությունը, որում ԼՂ-ն ընդգրկված է»,- այս կարծիքը «Национальная Служба Новостей»-ի հետ զրույցում հայտնել է, ՌԴ գիտությունների ակադեմիայի Արևելագիտության ինստիտուտի Կենտրոնական Ասիայի և Կովկասի հետազոտական կենտրոնի փորձագետ Անդրեյ Արեշևը:
Փորձագետը նշել է, որ թեեւ Լեռնային Ղարաբաղը սերտ տնտեսական կապերի մեջ է Հայաստանի հետ, բայց պետական կառավարման համակարգում այն անկախ է. «Սահմանադրական բարեփոխումները, որոնք հայտարարվել են Հայաստանում եւ իրականացվելու են դրա ապացույցն են: Դրանք Լեռնային Ղարաբաղին չեն վերաբերում: Նա կմնա նախագահական կառավարման համակարգով պետություն, ինչն իմ կարծիքով շատ ճիշտ է եւ հետխորհրդային տարածքում, եւ չճանաչված հանրապետությունում, որն ապրում է չավարտվող ռազմական ճնշման պայմաններում»:
Այն որ Լեռնային Ղարաբաղի կառավարման համակարգը չի փոխվում, ըստ Արեշեւի, հնարավորություն է տալիս այդ պետությանը բանակցային գործընթացի ընթացքում իր դիրքորոշումը հայտնել: «Չնայած նրան, որ պաշտոնական Բաքուն չի ցանկանում ճանաչել ԼՂ-ն որպես բանակցությունների անկախ կողմ, փաստացի Ստեփանակերտը մասնակցում է բանակցային գործընթացին: Եվ բոլոր քայլերը, որոնք կարող են կատարել միջնորդները, միանշանակ, պետք է համաձայնեցվեն այդ տարածքի իշխանությունների հետ»:
Նա որպես օրինակ է բերել Մինսկի ձեւաչափով Ուկրաինայի շուրջ տարվող բանակցությունները, որոնց մասնակցում են Դոնեցկի եւ Լուգանսկի չճանաչված հանրապետությունների ներկայացուցիչները:
Կարդացեք նաև
Անդրեյ Արեշեւը ընդգծել է, որ Ղարաբաղի գյուղատնտեսության ոլորտի հաջողություններն այդ երկրին թույլ կտան դառնալ ոչ միայն Հայաստանի եւ Ռուսաստանի մատակարար: «Ղարաբաղի արտադրանքը արդեն հայտնվում է ռուսական տարբեր խանութներում: Դա, իմ կարծիքով, բավականին համոզիչ ապացույց է, որ այդ չճանաչված պետությանը տեղեկատվական, քաղաքական եւ տնտեսական ոլորտներում շրջափակելու բոլոր փորձերն անարդյունավետ են»:
Պատրաստեց Աշոտ ԻՍՐԱԵԼՅԱՆԸ
