Ընդամենը մի քանի տարի առաջ բավականին անմխիթար և ոչ ներկայանալի վիճակում էր գտնվում Ակսել Բակունցի տուն-թանգարանն իր ծննդավայրում՝ Գորիսում: Այսօր արդեն այն վերանորոգված է և բաց այցելուների համար:
1968 թ. հիմնադրված թանգարանում հիմնանորոգման մեծածավալ աշխատանքներ են կատարվել 2012-2014 թթ.՝ ՀՀ մշակույթի նախարարության, ՀՀ սոցիալական ներդրումների հիմնադրամի, Պոլսահայերի միության, ինչպես նաև Սյունիքի մարզպետարանի աջակցությամբ:
Տուն-թանգարանն այժմ ունի երեք սենյակ և հացատուն: Անմիջապես մուտքի դիմաց բացվում է Բակունցի հուշասենյակը, որն անվանում են «Սանթրու կուճի օթախ»: Այդտեղ Բակունցի գրասեղանն է, վերնաշապիկը, կահույքը, մոր գործած գորգը: Հյուրասենյակում ներկայացված են գրողի կյանքն ու գործունեությունը, իսկ մյուս երկու սենյակներում նրա անձնական իրերն են: Բավականին տպավորիչ է խոհանոցը՝ թոնրատունը:
Կարդացեք նաև
Նշենք, որ տուն-թանգարանը սկզբնապես եղել է Գորիսի մշակույթի բաժնի ենթակայության տակ, իսկ 1976 թվականից դարձել է Ե. Չարենցի անվան գրականության և արվեստի թանգարանի մասնաճյուղ:
ՀՀ մշակույթի նախարար Հասմիկ Պողոսյանի գնահատմամբ՝ այս ձևաչափն առավել արդյունավետ է, քանի որ գլխավոր թանգարանի ֆոնդերը հնարավոր է օգտագործել մասնաճյուղ թանգարանն ավելի ակտիվ դարձնելու համար. «Բակունցի տուն-թանգարանի փորձի վրա հիմնվելով՝ եկել ենք այն եզրակացության, որ Համո Սահյանի ու Սերո Խանզադյանի թանգարանները ևս պետք է դառնան Գրականության և արվեստի թանգարանի մասնաճյուղեր»,- օրերս Սյունիքի մարզ կատարած աշխատանքային շրջայցի ժամանակ լրագրողների հետ զրույցում ասաց նախարարը:
Նրա դիտարկմամբ՝ այսպիսի թանգարանները բավականին լայն հնարավորություններ են տալիս նաև տարբեր միջոցառումներ իրականացնելու համար. «Շատ ճիշտ է, որ տուն-թանգարանները մեզ փոխանցում են իրենց ժամանակի միջավայրը, դարաշրջանը, կենցաղը: Կարծում եմ, որ այստեղ կարելի է և´ դասախոսություններ կարդալ, և´ կրթական ծրագրեր իրականացնել, և´ պատմական կենցաղը ներկայացնող միջոցառումներ կազմակերպել»,- ասաց Հ. Պողոսյանը:
Ա. Բակունցի տուն-թանգարանի վարիչ Վարդան Սարգսյանի փոխանցմամբ՝ թանգարանի հիմնական այցելուները ներքին զբոսաշրջիկներն են, քանի որ արտասահմանցիներին Բակունցն այնքան էլ հայտնի չէ:
«Բակունցը գորիսեցիների համար պաշտամունքի չափ սիրելի է, այնպես որ նրա հետ կապված ամեն ինչ գորիսեցիների համար թանկ է ու հարազատ: Իսկ զբոսաշրջիկներին ավելի շատ հետաքրքրում են ազգագրական տարրերով հարուստ խոհանոցը, Սարյանի, Ասլամազյանի կտավները, գրողի լուսանկարչական ապարատը, ինչպես նաև այգեգործական սրսկիչը (20-ականներին հենց Բակունցն է Գորիս բերել ծառերը մշակելու, սրսկելու մշակույթը): Մարդկանց հետաքրքրում է նաև գրողի ողբերգական մահը, մանավանդ որ այն տեղի է ունեցել ստալինյան բռնատիրության ժամանակաշրջանում»,- ասում է Ա. Բակունցի տուն-թանգարանի վարիչը:
Սիրանուշ ՀԱՅՐԱՊԵՏՅԱՆ
