Բուդաղյանների պաշտպան Հայկ Ալումյանի համար առանձնապես զարմանալի չէ, որ Սուրիկ Խաչատրյանի թիկնապահը, որը հանդես է գալիս որպես նրա օգնական, նշանակվել է Կապանի թիվ 6 դպրոցի փոխտնօրեն:
Հիշեցնենք, որ պարոն Ալումյանը բողոքներ էր ներկայացրել Սուրիկ Խաչատրյանի որդի Տիգրան Խաչատրյանի ու օգնական Զարզանդ Նիկողոսյանի նկատմամբ քրեական հետապնդումը դադարեցնելու որոշումների դեմ, որոնք դատարանը մերժել էր:
Aravot.am-ի հետ զրույցում պարոն Ալումյանը նշեց, որ այս նշանակումը օրինաչափ էր և Զարզանդ Նիկողոսյանն ավելի բարձր պաշտոնների էլ կարող է նույն տրամաբանությամբ հավակնել:
Կարդացեք նաև
Նա նշեց. «Եթե բազմիցս դատված Սուրիկ Խաչատրյանը կարող է Սյունիքի մարզպետ դառնալ, Զարզանդ Նիկողոսյանն ինչո՞ւ չի կարող դպրոցի փոխտնօրեն դառնալ: Ի՞նչ խնդիր կա: Դպրոցի փոխտնօրեն դեռ քիչ է նրա համար, շատ ավելի բարձր պաշտոնների կարող էր հավակնել, ընդհուպ մինչև կրթության և գիտության նախարար: Եթե Սուրիկ Խաչատրյանը կարող է լինել Սյունիքի մարզպետ, ապա Զարզանդ Նիկողոսյանը, եթե անգամ կրթության և գիտության նախարար նշանակվեր, դա նորմալ կտեղավորվեր այս ամենի մեջ, ես չէի զարմանա»:
Պարոն Ալումյանի կարծիքով` այս հարցերում ՀՀ իշխանությունները հետևողական են:
Մեր այն հարցին` այս նշանակումը մատաղ սերնդի զարգացման հարցում վտանգներ չի՞ պարունակում, պարոն Ալումյանը նկատեց, որ այսպես թե այնպես մարզի բոլոր դպրոցները ենթարկվում են մարզպետարանին, ուրեմն այս նշանակո՞ւմը պիտի վտանգավոր լիներ:
Հարցին` այս նշանակումը չի՞ խոչընդոտի իր մասնագիտական գործունեությանը, շարունակելո՞ւ է բողոքներ ներկայացնել, պարոն Ալումյանը պատասխանեց. «Խոչընդոտող սուբյեկտներ և հանգամանքներ այնքան կան, որ այս մեկը չի կարող խոչընդոտել: Երկու օր առաջ ստացել եմ դատավճիռ և առաջիկայում ներկայացնելու եմ վերաքննիչ բողոք»:
Տաթև ՀԱՐՈՒԹՅՈՒՆՅԱՆ
Հ. Գ. Կապանի «Խուստուփ» հեռուստաընկերության պատրաստած սեպտեմբերմեկյան ռեպորտաժի համաձայն՝ Զարզանդ Նիկողոսյանը ելույթ է ունեցել աշակերտների առաջ՝ որպես փոխտնօրեն (Զարզանդ Նիկողոսյանի խոսքը տեսանյութում՝ 9:40 րոպեից):
