Սեպտեմբերի 1-ին ադրբեջանական զինուժը գնդակոծել էր Տավուշի մարզի Բերդի սահմանագոտին: Պաշտպանության նախարարության մամուլի քարտուղար Արծրուն Հովհաննիսյանը հայտնել է, որ կա երկու վիրավոր՝ ժամկետային զինծառայողներ 19-ամյա Վլադիմիր Արամի Գեւորգյանը, եւ 22-ամյա Գոռ Համբարձումի Գեւորգյանը: Բերդի զինվորական հոսպիտալից Գոռ Գեւորգյանը տեղափոխվել էր Երեւան՝ կենտրոնական կլինիկական զինվորական հոսպիտալ:
Բերդի զինվորական հոսպիտալի բժիշկ Վարդան Սահակյանը հայտնեց, որ Վլադիմիր Գեւորգյանի վիճակը կայուն է: Նա ազդրերի եւ սրունքի բեկորային վնասվածքներ ունի: Բժիշկ Սահակյանն ասաց, որ Վ. Գեւորգյանին երկարատեւ բուժում է հարկավոր,ուստի նա վաղը կտեղափոխվի Երեւան՝ կենտրոնական կլինիկական զինվորական հոսպիտալ: Վ. Գեւորգյանը Սեւան քաղաքի բնակիչ է:
Ոսկան ՍԱՐԳՍՅԱՆ
