20 օրից ավելի ֆեյսբուք սոցիալական ցանցի օգտատերերին իրազեկում-հրավերքներ էր ուղարկվում առ այն, որ սեպտեմբերի 1-ին, ժամը 15.00-ին գրոհ է նախապատրաստվում Բաղրամյան 26-ի՝ նախագահական նստավայրի վրա: Իրազեկում-հրավերք ուղարկողներին կամ ուղարկողին ֆեյսբուքում բացահայտել հնարավոր չեղավ, քանի որ համապատասխան տողում նշվում էր, որ պետք չէ փնտրել հրավերքը տարածողին, քանի որ սա համայն հայության կողմից կազմակերպված ակցիա է եւ բոլորս ենք պարտավոր դրան մասնակցել:
Այսօր ժամը 3-ին նախագահական նստավայրի մոտ, սակայն, այդպես էլ ոչ ոք չեկավ ու գրոհը բնականաբար չկայացավ: Նշենք, որ ֆեյսբուքյան հրավերին մի քանի հարյուր մարդ էր միացել:
Սիրահարների զբոսայգում ժամը 16.00-ին նախատեսված «Ոչ թալանին» նախաձեռնող խմբի կազմակերպած ակցիան վերահսկելու համար այդ տարածքում պտտվող ոստիկանները աչքի պոչով հետեւում էին նաեւ Բաղրամյան 26-ի վրա հավանական գրոհողին ու միմյանց հետ զրույցներում տարբեր հումորներ անում դրա վերաբերյալ:
Նելլի ԳՐԻԳՈՐՅԱՆ
