Այսօր թիվ 155 հիմնական դպրոցում պատասխանելով լրագրողների հարցին, թե կառավարությունը մինչեւ էլեկտրաէներգիայի սակագնի բարձրացման առիթով անցկացվելիք աուդիտի ավարտը շարունակելո՞ւ է փոխհատուցել ժողովրդին, վարչապետ Հովիկ Աբրահամյանն ասաց. «Այո: Մենք հանրապետության նախագահի հետ պայմանավորվածություն ունենք: Մինչեւ հանձնաժողովում խորհրդատվության, ոչ թե աուդիտի, ավարտը կքննարկենք մեր մոտեցումները եւ կհայտարարենք: Բայց մինչեւ այդ, մենք ազգաբնակչությանը, ինչպես ես երեկ հայտարարեցի, փոքր եւ միջին ձեռնարկատերերին օգնելու ենք»:
Հարցին, թե խոշոր ձեռնարկատերերին օգնելու եք, Հովիկ Աբրահամյանը հակադարձեց. «Չեմ կարծում, թե ճիշտ կլինի ես Քաջարանի կոմբինատին, ցեմենտի գործարանին կամ որեւէ մեկին սուբսիդավորեմ: Ինչի՞ համար: Եթե մենք լրացուցիչ գումարներ ունենք, ավելի շատ թոշակները, նպաստները կբարձրացնենք, հաշմանդամներին կօգնենք, մեր բանակն ավելի լավ կվերազինենք: Կարծում եմ՝ մենք ճիշտ ենք»:
Աշոտ ՀԱԿՈԲՅԱՆ
