ՀՀ կառավարությունն այսօրվա նիստում որոշեց հավանություն տալ Սահմանադրության փոփոխությունների նախագծի վերաբերյալ ՀՀ կառավարության առաջարկություններին:
Նիստում ՀՀ արդարադատության փոխնախարար Արսեն Մկրտչյանն ասաց, թե սահմանադրական փոփոխությունների վերաբերյալ դեռեւս առաջարկություններ են ներկայացվում: Նա ժամանակ խնդրեց բոլոր առաջարկությունները ի մի բերելու համար:
Վարչապետ Հովիկ Աբրահամյանն էլ նշեց, թե փոխնախարարի հետ երեկ վեց ժամ քննարկել են հարցը, եւ կան առաջարկություններ, որոնք արժանի են քննարկման: Նա ասաց, որ մի քանի օր քննարկելուց հետո ինքը կստորագրի փաստաթուղթը եւ այն կներկայացվի ԱԺ:
Կարդացեք նաև
Ուշագրավ երկխոսություն ծավալվեց վարչապետ Հովիկ Աբրահամյանի եւ էկոնոմիկայի նախարար Կարեն Ճշմարիտյանի միջեւ: Խոսքը Հայաստանի և Չինաստանի Ժողովրդական Հանրապետության կառավարությունների միջև նախատեսված ստորագրվելիք առևտրական ներկայացուցչությունների փոխադարձ համաձայնագրին էր վերաբերում, որը մշակվել է Հայաստանի և Չինաստանի միջև գործարար նախաձեռնությունների ակտիվացման և առևտրատնտեսական համագործակցության ընդլայնման նպատակով:
Հովիկ Աբրահամյանը Ճշմարիտյանից հետաքրքրվեց, թե քանի երկրում Հայաստանն ունի առևտրային ներկայացուցչություն եւ ի՞նչ արդյունք են տալիս այդ ներկայացուցչությունները Հայաստանին: Էկոնոմիկայի նախարարը պատասխանեց, թե ներկայացուցչություններ ունեն Եվրամիությունում, ԱՄՆ-ում, Մոսկվայում, Առևտրի համաշխարհային կազմակերպությունում:
Հովիկ Աբրահամյանը հարցրեց՝ «Ուրիշ երկրների դեսպանները մտնում են մեր երկիր, ուզում են ներդրումներ տանեն: Մի հատ տեսնենք՝ էս մարդիկ ինչ-որ բան անո՞ւմ են»,- նշեց վարչապետը:
Ի պատասխան՝ Կարեն ճշմարիտյանը նշեց, որ ակտիվ գործում է Մոսկվայի ներկայացուցչությունը, իսկ ԱՄՆ-ում հաստիքը կա, բայց թափուր է, ներկայացուցիչ չկա: «Եթե հաստիք չկա, չենք ֆինանսավորո՞ւմ»,- հարցրեց վարչապետը:
Կարեն Ճշմարիտյանը կասկածելով ասաց, որ եթե մարդ չկա, ուրեմն ֆինանսավորում էլ չի լինում հավանաբար: «Եթե հաստատված հաստիքը կա, փողը գնում ա, ո՞նց չի գնում: Պարոն Խաչատրյան, մի հատ նայեք»,- ֆինանսների նախարարին դիմելով ասաց վարչապետը:
Հովիկ Աբրահամյանը նաեւ նշեց, որ առևտրային ներկայացուցիչները պետք է անպայման ներդրումներ բերեն Հայաստան, պետք է քննարկել հարցը. «Մենք տեսնում ենք այլ երկրների դեսպաններն ինչ են անում մեր երկրում»:
Նելլի ԲԱԲԱՅԱՆ
