Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանի դատավոր Սիմիզար Հովսեփյանը կայացրել է մի որոշում, որի մասին «Առավոտը» տեղեկացավ երեկ: Որոշումը, որը թվագրված է օգոստոսի 12-ով, իրականում կայացվել է հուլիսի 30-ին:
Այն առնչվել է երեք ատյանի դատարաններում ավարտված պատվին, արժանապատվությանը հասցված վնասի փոխհատուցման պահանջի վերաբերյալ գործի հետ, որտեղ «Առավոտը» ներգրավված էր որպես երրորդ անձ: Խոսքը նախկին վարչապետ Տիգրան Սարգսյանի դստեր՝ Նարինե Սարգսյանի եւ խնամու՝ Հրանտ Սուվարյանի հայցի մասին է, «Առավոտ» օրաթերթին հարցազրույց տված քաղաքացիներ Լեմբերիկ Խաչատրյանի եւ նրա կնոջ՝ Սուսաննա Դավթյանի դեմ:
Արաբկիր եւ Քանաքեռ-Զեյթուն վարչական շրջանների դատարանին էր դիմել Լեմբերիկ Խաչատրյանը: Նա հայտնել էր, որ դատարանի վճռով իրենց պարտավորեցվել է հերքման տեքստը տեղադրել օրաթերթում, բացի այդ, դատարանը վճռել է համապարտության կարգով հօգուտ Նարինե Սարգսյանի եւ Հրանտ Սուվարյանի բռնագանձել հարյուր հազարական դրամ՝ որպես փոխհատուցման գումար, հարյուր հազարական դրամ էլ առանձին-առանձին՝ որպես փաստաբանին վճարվելիք «խելամիտ» վարձատրության ծախս:
16000-ական դրամ էլ ամուսինները պետք է վճարեին որպես պետական տուրքի գումար:
Ըստ Լեմբերիկ Խաչատրյանի՝ տեղի էր ունեցել վրիպակ, եւ վրիպակն ուղղելու նպատակով նա դատարան դիմելով հայտնել էր, թե. «Վճռում նշվել է 100 000 ՀՀ դրամ ավել բռնագանձման գումար»:
Լ.Խաչատրյանը խնդրել էր դատարանից 100 000 ՀՀ դրամ ավել բռնագանձելու վերաբերյալ «տեղ գտած թվաբանական սխալն ուղղել»: Դատարանը ուղղել էր վրիպակը, վճռից ամբողջությամբ հանելով 4-րդ կետը: Դատարանը գտել էր, որ պահանջը հիմնավոր է: 4-րդ կետը վճռում շարադրված էր հետեւյալ ձեւակերպմամբ. «Համապարտության կարգով Սուսաննա Դավթյանից եւ Լեմբերիկ Խաչատրյանից հօգուտ Նարինե Սարգսյանի բռնագանձել 100 000 ՀՀ դրամ՝ որպես փաստաբանի խելամիտ վարձատրության ծախս»: Նշենք, որ վճիռ կայացրած դատարանը, համաձայն ՀՀ քաղաքացիական օրենսգրքի, իրավունք ունի գործին մասնակցող անձանց դիմումի համաձայն կամ իր նախաձեռնությամբ ուղղել թույլ տրված վրիպակները, գրասխալները եւ թվաբանական սխալները՝ չփոխելով վճռի բովանդակությունն ու էությունը:
ՌՈՒԶԱՆ ՄԻՆԱՍՅԱՆ
«Առավոտ» օրաթերթ
29.08..2015
