Սեպտեմբերի 10-ից հոկտեմբերի 5-ը Բաքվում կայանալու է շախմատի աշխարհի գավաթի խաղարկությունը, որին մասնակցելու են 128 ուժեղագույն շախմատիստներ:
Վերջերս հայտնի դարձավ, որ ընդառաջելով ՖԻԴԵ-ի նախագահ Կիրսան Իլյումժինովի հորդորներին, որը հավաստիացրել է, թե Ադրբեջանի ամենաբարձր ղեկավարության մակարդակով պաշտոնապես ստացել է Հայաստանի շախմատիստների անվտանգության երաշխիքներ, աշխարհի գավաթի խաղարկությանը մասնակցելու իրավունք նվաճած մեր չորս շախմատիստները համաձայնել են մեկնել հարեւան երկիր, չնայած այն բանին, որ նրանց հավաքականը առանց որեւէ լուրջ պատճառի ու հիմնավորման հրաժարվել էր ժամանել Հայաստան եւ հանդես գալ ապրիլին Ծաղկաձորում անցկացված աշխարհի թիմային առաջնությունում՝ քաջ գիտենալով, որ իրենց մարզիկները, ի տարբերություն մերոնց՝ Ադրբեջանում գտնվելու պայմանների, Հայաստանում անվտանգության հետ կապված խնդիրներ չեն ունենում: Ավելին, նրանք, սկսած մարզիկներից, վերջացրած մարզիչներով, ազատ, առանց որեւէ խնդրի շրջել են Երեւանի փողոցներում, Հանրապետության հրապարակում երեկոները վայելել երգող շատրվանների գեղեցկությունը:
Մերոնց որոշումը, կարծես, վերջնականապես կայացված է ու միայն դա արդեն իսկ հաղթանակ է՝ անկախ ցուցադրվելիք մարզական արդյունքներից: Մյուս մարզաձեւերի մասնակցության փորձից ելնելով՝ նախապես պարզ է, որ հարեւանների մոտ շախմատիստներն էլ իրենց զգալու են կիսագերու կարգավիճակում ու ամբողջովին միայն շախմատային կյանքով ապրելու հնարավորություն չեն ունենալու:
Հայաստանը Բաքվում ներկայացնելու են գրոսմայստերներ Լեւոն Արոնյանը, Հրանտ Մելքումյանը, Գաբրիել Սարգսյանը եւ Սամվել Տեր-Սահակյանը:
«Առավոտը» տեղեկացավ, որ մեր տղաներից յուրաքանչյուրը մրցաշարին նախապատրաստվում է անհատական ծրագրով: Մասնավորապես, Լեւոն Արոնյանն այս օրերին աշխարհի 10 ուժեղագույն գրոսմայստերների խմբում ԱՄՆ-ի Սենթ-Լուիս քաղաքում մասնակցում է Սինքֆիլդի գավաթի խաղարկությանը, Գաբրիել Սարգսյանը վերջերս Իսպանիայում հանդես եկավ այդ երկրի ակումբային առաջնությունում, Հրանտ Մելքումյանը ուժերը ստուգեց Լիտվայի միջազգային ներկայացուցչական մրցաշարում: Իսկ ահա Սամվել Տեր-Սահակյանը գերադասել է նախապատրաստվել Հայաստանում:
ԱՇՈՏ ՀԱԿՈԲՅԱՆ
Կարդացեք նաև
«Առավոտ» օրաթերթ
26.08..2015
