Եթե իրապես ցանկություն և քաղաքական կամք կա Հայաստանը դարձնել խորհրդարանական պետություն, ապա սահմանադրության նախագծում պետք է իրական խորհրդարանական լծակներ նախատեսել, որոնք թույլ կտան իրական մասնակցություն ունենալ գործադիր իշխանության ձևավորման գործում և խորհրդարանական վերահսկողություն իրականացնել գործադիր իշխանության նկատմամբ. իր առաջարկների մասին Ֆեյսբուքյան էջում գրել է ԱԺ պատգամավոր Էդմոն Մարուքյանը։
Ես առաջարկում եմ. նախարարների, մարզպետների, դեսպանների և այլ բարձրաստիճան պաշտոնատար անձանց թեկնածությունները հաստատման ներկայացնել ԱԺ համապատասխան մշտական հանձնաժողով, օրինակ` արդարադատության նախարարի թեկնածությունը պետք է հաստատվի ԱԺ պետական իրավական հարցերի մշտական հանձնաժողովում, մարզպետի թեկնածությունը` ԱԺ տարածքային կառավարման և տեղական ինքնակառավարման հարցերի մշտական հանձնաժողովում, դեսպանի թեկնածությունը պետք է հաստատվի ԱԺ արտաքին հարաբերությունների մշտական հանձնաժողովում և այդպես շարունակ: Սահմանադրական բարեփոխումների հրապարակված նախագծում նման մեխանիզմներ նախատեսված չեն, իսկ առաջարկված լծակները բավարար չեն խորհրդարանական կառավարում ապահովելու համար:
Հետևաբար վերը նշված խորհրդարանական կառավարման և վերահսկման կառուցակարգեր չներդնելու պարագայում մենք կունենանք վարչապետական կամ գործադիրական կառավարում, որտեղ խորհրդարանը կունենա սահմանափակ դեր:
