«Թուրքիայի Սահմանադրությունը պահանջում է, որ ամենաշատ ձայներ ստացած ուժը փորձի կոալիցիա ձևավորել, և, հետևելով այդ իրավական նորմին, տեղի են ունենում բանակցություններ: Սակայն Թուրքիայում անցկացվող բանակցություններն ի սկզբանե տապալված են, որովհետև կողմերի միջև քաղաքական ու գաղափարական կարևոր հակասություններ կան»,- այսօր «Հայելի» ակումբում լրագրողների հետ հանդիպման ժամանակ այսպիսի տեսակետ արտահայտեց պատմաբան Ռուբեն Մելքոնյանը՝ անդրադառնալով նոյեմբերին Թուրքիայում կայանալիք արտահերթ խորհրդարանական ընտրություններին:
Պատմաբանի կանխատեսմամբ՝ Էրդողանի «Արդարություն և զարգացում» կուսակցությունը քրդամետ «Ժողովուրդների ժողովրդավարություն» կուսակցությունից մի քանի անգամ ավելի ձայներ է հավաքելու և դրա համար ոչինչ չի խնայելու. «Բացի միանձնյա կառավարման ձևավորումից, ցանկացած այլ տարբերակ Էրդողանի համար անընդունելի է: Եվ Թուրքիայի քաղաքական դաշտն ագրեսիվանում է: Ագրեսիվացման տեմպերը մինչև նոյեմբեր ավելի կխորանան, և Թուրքիայի իշխանությունները քաղաքական խնդիրները կլուծեն ագրեսիվ դաշտում»,- կարծում է Ռ. Մելքոնյանը:
Սիրանուշ ՀԱՅՐԱՊԵՏՅԱՆ
