«Ոչ մի արտառոց բան տեղի չի ունեցել»,- Հանրապետության հրապարակում, անդրադառնալով ոստիկանության գործողություններին, ասաց «Ոտքի Հայաստան» նախաձեռնության անդամ Դավիթ Սանասարյանը:
Նրա խոսքերով՝ 30 րոպեների ընթացքում տեղի ունեցածն անկախությունից ի վեր տեղի ունեցող գործընթացներ են: Նա նշեց, որ նախաձեռնության անդամները կշարունակեն դիմել քաղաքացիական անհնազանդության՝ մինչեւ իրենց գաղափարակից ընկերները ազատ չարձակվեն:
Նախաձեռնության անդամները շարժվեցին դեպի Սարգսյան-Ամիրյան փողոցների խաչմերուկ եւ նստեցին հետիոտնային անցումի վրա: Ոստիկանները ազատեցին անցումը՝ բռնելով ակտիվիստներից ձեռքերից եւ ոտքերից:
Դավիթ Սանասարյանը նախաձեռնության մի քանի անդամների հետ շարժվեց դեպի հաջորդ հետիոտնային անցումը: Այնտեղ նրան հանդիպեց Երեւանի փոխոստիկանապետ Վալերի Օսիպյանը: Նա Դավիթ Սանասարյանին ասաց, որ նախաձեռնության անդամների գործողություններն անօրինական են:
Կարդացեք նաև
Ակտիվիստները հետաքրքրվեցին, թե արդյոք պատժվելու է այն ոստիկանը, որը հարվածել եւ հայհոյել էր տարեց տղամարդուն: Օսիպյանը խոստացավ, որ ոստիկանն անպայման պատասխանատվության է ենթարկվելու:
Դավիթ Սանասարյանն Օսիպյանից խնդրեց ազատ արձակել իր գաղափարակից ընկերներին: Օսիպյանն որոշ ժամանակ հետո պատասխանեց, որ բերման ենթարկված ակտիվիստները 15 րոպեից ազատ կարձակվեն:
Ամի ՉԻՉԱԿՅԱՆ
