Աշխարհաքաղաքական ու տնտեսական շարունակվող բարդ իրավիճակում, երբ ՌԴ-ի տնտեսությունն օրեցօր գահավիժում է ու դրա ականատեսն ենք լինում բոլորս, երբ ԵՏՄ-ի ՀՀ-ի անդամությունից ի վեր դեռ որեւէ մեկը չի գրանցել այն դրական զարգացումները, որոնք ակնկալվում էին, ՀՀ իշխանությունները դեռ շարունակո՞ւմ են լավատեսական տրամադրությունները Եվրասիական տնտեսական միությանը Հայաստանի անդամակցության մասով`Aravot.am-ի հարցին, այսօր Եվրասիական տնտեսական հանձնաժողովի անդամ Կարինե Մինասյանը պատասխանեց. «Մենք շարունակում ենք մնալ պրագմատիկ: Եվ պետք է աշխատենք, որպեսզի կարողանանք այն հնարավորությունները, որոնք, այնուհանդերձ, ստեղծում է ԵՏՄ-ն, օգտագործել մեր տնտեսական զարգացման համար»:
Տիկին Մինասյանը նկատում է, որ ԵՏՄ-ին անդամակցելուց հետո Հայաստանի գյուղատնտեսական ապրանքների արտահանումն ավելացել է եւ աճում է նաեւ նրա շնորհիվ, որ բավական պարզեցված են ԵՏՄ անդամ երկրներ արտահանման գործընթացները: «Իհարկե, դեռ անելիքներ ունենք ավելի լավ պայմաններ ստեղծելու համար: Մասնավորաբար, մեր կառավարությունն այժմ աշխատում է լոգիստիկ`ճանապարհային, խնդիրները լուծելու ուղղությամբ»:
Ծառայությունների ոլորտում աշխատավարձերի տարբերություններն, ըստ Կարինե Մինասյանի, ԵՏՄ շուկայում Հայաստանին մրցունակ լինելու հնարավորություն է տալիս: Իսկ ապրանքների ոլորտում արտահանումների նվազումը, նա եւս կապում է աշխարհաքաղաքական եւ տնտեսական զարգացումներով, արտարժույթի տատանումներով, ինչը դեռ կշարունակվի:
Կարդացեք նաև
«Միգուցե մի քիչ լավ ձեւակերպում չի, բայց եթե Հայաստանը ԵՏՄ անդամ չլիներ, իրականում կարող էր ավելի վատ իրավիճակ լինել մեզ համար, քանի որ մեր տնտեսության կախվածությունը ՌԴ տնտեսությունից, բավական շատ է ու, մասնավորաբար, արտահանման ոլորտում: Իրականում մենք արտահանման աճ ունենք`հանքահումքային ոլորտի հաշվին, որը բարձր ավելացված արժեք չի արձանագրում»,-ասաց մեր զրուցակիցը:
Նելլի ԳՐԻԳՈՐՅԱՆ
