Բաց նամակ ՀՀ Վարչապետ Հովիկ Աբրահամյանին
Հարգելի Հովիկ Աբրահամյան,
Մեր երկրի անկախության 24-րդ տարեդարձի շեմին Հայաստանի ավագ սերնդի մոտ հարց է հասունացել․ ի՞նչ երկիր եք Դուք մեզանից ստացել մեկ քառորդ դար առաջ եւ ի՞նչ երկիր եք թողնելու հաջորդ սերունդներին։
Մենք խորապես մտահոգված ենք, որ Հայաստանի կառավարությունը այսօր չունի երկրի ապագայի տեսլական եւ ապրում է 1 օրվա խնդիրներով։ Մենք տեսնում ենք, որ կառավարությունը անզոր է հաղթահարել կոռուպցիան, ապահովել երկրում ներդրումների համար բարենպաստ պայմաններ եւ ապագայի հեռանկար ստեղծել մեր երկրի երիտասարդության համար։ Մենք տեսնում ենք նաեւ, որ երիտասարդությունը մեր երկրում սկսել է ընդվզվել այս իրավիճակի դեմ եւ դուրս է գալիս պայքարի՝ արժանապատիվ ապագա ունենալու իր իրավունքի համար։
Կարդացեք նաև
Մենք որոշել ենք աջակից դառնալ երիտասարդներին՝ իրենց արդար պայքարում։ Մեր թոռների ապագայի համար պայքարի դուրս գալուց առաջ որոշեցինք նաեւ հանդիպել ձեզ հետ՝ մեր ազգին վերաբերող կարեւորագույն հարցերը քննարկելու համար։
Դիմում ենք Ձեզ առաջարկով՝ ընդունել մեր պատվիրակությանը եւ կազմակերպել այդ հանդիպումը։
«Հայաստանի ավագների Խորհուրդ» քաղաքացիական շարժման նախաձեռնող խումբ։
Պարգեւ Բադոյան, էներգոմեխանիկ,
Էդիկ Խաչատրյան, ձեռներեց,
Հակոբ Նազարի-Դեխնավի, ճարտարապետ-ճարտարագետ,
Ք․ Երեւան, Հանրապետության հրապարակ,
18 օգոստոսի, 2015թ․
