«Լրատվական կայքերի ամենաընթերցված լուրերը բացառապես վերաբերում են սպանություններին, ինքնասպանություններին, վթարներին, ծեծերին և այլ բռնություններին»,- նկատել է Հայկական հոգեբուժական ասոցիացիայի նախագահ Արմեն Սողոյանը:
Նա այսօր լրագրողների հետ հանդիպման ժամանակ իր մտահոգությունը հայտնեց, որ ԶԼՄ-ներով բռնության «քարոզչությունը» և հասարակության շրջանում այդպիսի լուրերի հանդեպ հետաքրքրությունն արդեն հասնում են վտանգավոր շեմի: Նրա պնդմամբ՝ վերջին շրջանում հոգեբույժների օգնությանը դիմող քաղաքացիների թիվն աճել է, և հոգեբույժները որոշել են կոչով հանդես գալ:
Հիշեցնենք, որ օրերս Հայկական հոգեբուժական ասոցիացիան հայտարարություն էր տարածել, որով կոչ էր արվում ԶԼՄ-ներին խնայել սպառողների հոգեկան առողջությունը և չհրապարակել նման նյութեր:
«Ամենօրյա աշխատանքներում դժբախտ պատահարների, բռնությունների, սպանությունների, ինքնասպանությունների, չապացուցված հանցագործությունների, ինչպես նաև մասնագիտական գործունեության ընթացքում ենթադրվող սխալների վերաբերյալ լուսաբանումներում առաջնորդվել սպառողների շահերով՝ խնայելով նրանց ընդհանուր առողջության ամենակարևոր բաղադրիչներից մեկը՝ հոգեկան առողջությունը»,- նշված է հայտարարության մեջ:
Կարդացեք նաև
«Մեկը մյուսին կացնահարել կամ թունավորել է, եղբայրն է եղբորը սպանել, երրորդն ինքնասպան է եղել… ի՞նչ են տալիս այսպիսի լուրերն ընթերցողին. միայն վնասում են»,- համոզված է Հայկական հոգեբուժական ասոցիացիայի նախագահը:
Քանի որ հոկտեմբերի 10-ը Հոգեկան առողջության միջազգային օրն է, Հայկական հոգեբուժական ասոցիացիան ողջ ամսվա ընթացքում տարբեր միջոցառումներ է նախաձեռնելու, այդ թվում նաև ուսումնասիրելու է ԶԼՄ-ների աշխատանքը, որպեսզի պարզի, թե որ լրատվամիջոցներն են ամենաշատը և ամենաքիչը լուսաբանում բռնությունները:
Սիրանուշ ՀԱՅՐԱՊԵՏՅԱՆ
