Հայաստանի եւ Ադրբեջանի միջեւ լարվածությունը վերջին շրջանում նկատելիորեն ավելացել է եւ դա հատկապես ակնհայտ է դարձել Ուկրաինայի ճգնաժամից հետո: Այս եզրակացությանն են հանգել ամերիկյան «Stratfor» վերլուծական կենտրոնի աշխատակիցները:
Այսօր հրապարակված զեկույցում նշված է, որ Հայաստանի եւ Ադրբեջանի զինված ուժերն անընդհատ խախտում են հրադադարի ռեժիմը, եւ լարվածության նման մակարդակ չի եղել վերջին 20 տարիներին:
«Stratfor»-ի կարծիքով՝ Ռուսաստանն իր ազդեցությունը կորցրել է Կովկասում եւ Մոսկվայի ուշադրությունն ավելի շատ կենտրոնացած է Ուկրաինայի իրադարձությունների վրա:
«Ավելի վաղ Ռուսաստանի ռազմական ներկայությունը Հայաստանում, եւ Մոսկվայի ամուր դիրքերը տարածաշրջանում, բավարար էին խաղաղությունը պահպանելու համար: Սակայն Ուկրաինայի արեւելքում սկսված իրադարձություններից հետո Եվրոպական միությունը սկսեց խաղալ Ադրբեջանի հետ որպես Եվրոպա էներգակիրների մատակարարման այլընտրանքային տարբերակ: Դա թույլ է տվել Բաքվին ամրապնդել իր դիրքերը տարածաշրջանում այն ժամանակ, երբ Մոսկվան կորցնում էր իր դիրքերը»,- գրված է «Stratfor»-ի զեկույցում:
Կարդացեք նաև
Ելնելով վերոգրյալից՝ հեղինակները եզրակացնում են, թե հենց այդ է պատճառը, որ Ադրբեջանը սկսել է ավելի ագրեսիվ գործել վերջին տարվա ընթացքում եւ փորձում է փոփոխել ստատուս-քվոն:
Պատրաստեց Աշոտ ԻՍՐԱԵԼՅԱՆԸ
