Հանրային ծառայությունները կարգավորող հանձնաժողովը (ՀԾԿՀ), որն այսօր նիստ էր հրավիրել մի քանի հարցերով, օրակարգից հանեց Արտավազդ Ստեփանյանի դիմումն ընդդեմ «Հայաստանի էլեկտրական ցանցեր» փակ բաժնետիրական ընկերության: Հանձնաժողովը պատճառաբանեց, որ ընկերությունը հետ է վերցրել բողոքը:
Այսօր հանձնաժողովում ՀԷՑ-ի ներկայացուցիչն ասաց, որ ընկերության ունեցած խնդիրներով պայմանավորված, ուշացրել են «Շաբեր» ընկերության հոսանքի մատակարարումը, սակայն խնդիրն արդեն լուծվել է:
Aravot.am-ի հարցին ի պատասխան, «Շաբեր» ընկերության ներկայացուցիչ Լյուդվիգ Միքայելյանը հաստատեց, որ ՀԷՑ-ը պայմանագիրը խախտել է: Համաձայն պայմանագրի, ՀԷՑ-ը պարտավոր էր մինչեւ այս տարվա 2015 թվականի մայիսի 17-ը, Գուսան Շերամի փողոցի 50/6 հասցեի սեփականատեր Արտավազդ Ստեփանյանի սպառման համակարգը միացնել էլեկտրական ցանցին, սակայն մինչ օրս չի միացրել:
Երբ ընկերությունը դիմել է ՀԷՑ-ին, նրան պատասխանել են, որ Հայաստանի էլեկտրական ցանցեր ընկերությունը գտնվում է ֆինանսատնտեսական բարդ վիճակում, եւ նշված աշխատանքների իրականացումը հնարավոր կլինի միայն այն դեպքում, եթե դիմողի կողմից միացման փաստացի ծախսումների գումարը՝ 3 միլիոն 563 540 դրամի չափով, ամբողջությամբ վճարվի` հետագա 5 տարիների ընթացքում սպառված էլեկտրաէներգիայի դիմաց վճարների հաշվին մարելու պայմանով:
Կարդացեք նաև
Արտավազդ Ստեփանյանը դիմել էր հանձնաժողով, որն էլ գտել է, որ ՀԷՑ-ը խախտել է օրենսդրությունը, ինչի համար որոշում էր կայացրել 5 միլիոն դրամ էլեկտրամատակարար ընկերությանը տուգանել: Բացի այդ, ՀԷՑ-ին պարտավորեցրել էր միացման պայմանագրով սահմանված ժամկետում ավարտել սպառման համակարգն էլեկտրական ցանցին միացման աշխատանքները:
Մեր այն հարցին, թե ինչու է հետ վերցրել դիմումը, Լյուդվիգ Միքայելյանն ասաց, որ ՀԷՑ-ը խոստացել է լուծել խնդիրը: Հետաքրքրվեցինք նաեւ, թե ֆինանսական կորուստներ ունեցե՞լ է էլեկտրական ցանցերի պատճառով, քանի որ խոստացված ժամկետում չի կատարել էլեկտրաֆիկացումը, պարոն Միքայելյանն ասաց` ոչ:
Մեզ հետ զրույցում Լյուդվիգ Միքայելյանն ասաց, որ իրենց կազմակերպությունը զբաղվում է ոսկերչական գործիքների արտադրությամբ:
Լուսինե ԲՈՒԴԱՂՅԱՆ
