«Շատ կամայական մի վաճառք է իրականացրել մեկ ամիս առաջ գրանցված մի ՍՊԸ-ի, որի ղեկավարը Արմեն Զավենի Գեւորգյանն է: Ո՞վ է այդ մարդը, ինչո՞վ է հայտնի, ի՞նչ երաշխիք ունեն, որ այդ ՍՊԸ-ին վստահում են նման կառույցի վերանորոգումը՝ հյուրանոց, ընտանեկան ժամանցի կենտրոններ, կազինո կառուցելու»,- այսօր «Անդրադարձ» ակումբում Մարզահամերգային համալիրի վաճառքի հետ կապված իր մտահոգությունները հայտնեց Երեւանի ավագանու «Բարեւ Երեւան» խմբակցության անդամ Անահիտ Բախշյանը:
Նրա խոսքերով՝ այդ Արմեն Զավենի Գեւորգյանն անհայտ մարդ է. «Մենք գիտենք ՀՀ-ում բոլոր հարուստների անունները, ում մոտ կուտակված է մեծ հարստություն: Բայց այս մարդու անունը չենք լսել: Հիմա պետք է պեղենք՝ ում խնամին է, ում քավորն է, ում սանիկն է, ում փեսան է, կարող է ինչ-որ մեկի փեսան է այս օլիգարխների: Դժվար չի, կպեղենք եւ շուտով կիմանանք՝ ինքը ով է, որ այդ չափի ներդրում է խոստանում կառավարությանն անել: Անընդհատ մեդիայում պտտվում է այս հարցը՝ ո՞վ է այդ մարդը, եւ ոչ մեկը կառավարությունից չի ասում: Ոչ մեկը չի համարձակվում վեր կենալ ասել, որ այդ մարդը, օրինակ, իմ խնամին է: Բայց վերջիվերջո կպարզվի: Ասում են՝ մախաթը պարկի մեջ չես պահի, իսկ սա հաստատ մախաթ է, որ ոչ մի պարկի մեջ չի տեղավորվի: Շատ անպատվաբեր, Սփյուռքի համար շատ անհասկանալի, տգեղ գործարք արեց կառավարությունը: Ամո՛թ»:
Տիկին Բախշյանը նշեց, որ մի կողմից կառավարությունը ոսկեզօծում է իր շենքը, մյուս կողմից գումար չունեն առաջին հանրապետության վարչապետ Արամ Մանուկյանի տուն-թանգարանի հիմնանորոգման համար. «Այնտեղ ավերակ է, արժի չէ՞, որ այդ մարդու հիշատակը պատշաճ հիշենք: Թող փող տան Աջափնյակում Նազարբեկյան 48 անտանիք շենքի համար, որտեղ մարդիկ ապրում են բաց երկնքի տակ, անձրեւի եւ կարկուտի տակ, շենքը չունի կոյուղի, միացված չէ կոյուղուն, վերելակները բաց, վտանգավոր, շենքն ունի 51 ընտանիք, այդ շենքի համար թող փող տան»:
Մեր հարցին՝ ի՞նչ լուծում եք առաջարկում, ցույցե՞ր անել, բողոքի ակցիանե՞ր կազմակերպել համալիրի վաճառքի գործարքը չեղարկելու համար՝ Անահիտ Բախշյանը պատասխանեց. «Ինչ եղավ Փակ շուկայի հետ, որ հիմա ինչ անենք: Աննամուս կառավարության համար…Չենք կարող հաշտվել, ով հասնի՝ պիտի թքի մրի: Բայց չի ազդում: Տակը պատկերացնում եմ, թե ինչ ստորջրյա հոսանքներ են գնում, այդ ում են լավություն արել, ում ինչ են խոստացել: Չզարմանաք, որ մի օր էլ ասեն՝ գիտեք այդ գործարքից մեր բանակը ոնց է շահել, ախր ամեն բան հո չենք ասելու: Մեր բանակը նենց շահեց, որ…միջուկային զենք ենք առել, օրինակի համար: Հնարավոր է»:
Կարդացեք նաև
Հռիփսիմե ՋԵԲԵՋՅԱՆ
