Երեկ երեկոյան Գյումրու բժշկական կենտրոն է հոսպիտալացվել ավտովթարից տուժած 6 քաղաքացի։ Գյումրի-Վանաձոր ճանապարհահատվածում` Ջաջուռի մոտակայքում շրջված ավտոմեքենայի ուղևորներից մեկն առաջին բուժօգնությունը ստանալուց հետո դուրս է գրվել, իսկ 4-ը` մարմնական տարբեր վնասվածքներով` բաց վերքեր, փափուկ հյուսվածքների սալջարդեր, դեռևս գտնվում են հիվանդանոցում` մասնագետների հսկողության ներքո։
Տուժածներից մեկի` Մեծ Բրիտանիայի 17-ամյա քաղաքացու մոտ կրծքավանդակի բազմակի վնասվածքներ են առկա, այդ թվում` հեմոպնևմաթորաքս։ Գյումրու ԲԿ-ում ստացել է բժշկական անհրաժեշտ օգնություն։ Գիշերը ՀՀ առողջապահության նախարարությունը կազմակերպել է հիվանդի տեղափոխումը Երևանի «Սուրբ Գրիգոր Լուսավորիչ» բժշկական կենտրոն։ Տուժածն այժմ գտնվում է վերակենդանացման բաժանմուքում, վիճակը գնահատվում է ծանր կայուն։ Հետագա բուժումը կստանա բազմապրոֆիլ հիվանդանոցի թոքաբանների հսկողությամբ։
Բոլոր տուժածներն անցել են գործիքային և լաբորատոր անհրաժեշտ հետազոտությունները։
Տեղեկացնենք նաև, որ Գեղարքունիքի մարզի Սևան-Գավառ ավտոճանապարհին շրջված ավտոբուսի տուժած բոլոր ուղևորները լավացումով դուրս են գրվել։
Կարդացեք նաև
ՀՀ առողջապահության նախարարությունն արձագանքում և ըստ անհրաժեշտության արագ կազմակերպում է վթարների, պատահարների, թունավորումների հետևանքով տուժած քաղաքացիներին մասնագիտական բժշկական օգնությունը։ Հարկ եղած դեպքում ՀՀ ԱՆ գլխավոր և հանրապետության առաջատար մասնագետների ընդգրկմամբ կոնսիլիումներ են իրականացվում, տարբեր հետազոտություններ կատարվում։ Երբեմն մասնագետների և տեխնիկական մեծ ներուժ կենտրոնացնելու անհրաժեշտություն է առաջանում։ Սակայն, նման դեպքերի հետևանքներից կարելի է հնարավորինս խուսափել, եթե մեր բոլոր վարորդներն և հետիոտնները խստորեն հետևեն ճանապարհային երթևեկության կանոններին, եթե խստորեն կիրառվեն սննդամթերքի պահպանման և սանիտարահիգիենիկ բոլոր նորմերը, առողջ ապրելակեպի կանոնները։ Խոսքը ոչ թե առողջապահական համակարգի ներուժի վատնման մասին է, այլ առաջին հերթին մեր քաղաքացիների առողջության պահպանման։
ՀՀ առողջապահության նախարարություն
