«Մենք հենց սկզբից էլ ասել ենք, որ մեզ աուդիտն իրականում տենց չի էլ հետաքրքրում: Անգամ իրենք հայտարարել էին, որ մենք իրենց մի փոքր շանս տվեցինք, որ իրենք իրենց ասած աուդիտի միջոցով, գործընթացների միջոցով այս ամեն ինչը ծածկեն անցնի գնա, բայց ոնց որ իրենք չեն օգտվում այս առիթից»,- այս մասին, Aravot.am-ի հետ զրույցում անդրադառնալով Հայաստանի էլեկտրական ցանցերում սպասվող աուդիտին, ասաց «Ոչ թալանին» նախաձեռնության անդամ Արթուր Քոչարյանը:
Հիշեցնենք, որ Հայաստանի կառավարությունը օգոստոսի 13-ին էներգետիկայի բնագավառում կարգավորման խորհրդատվական ծառայության մատուցումն իրականացնելու համար որոշել է պայմանագիր կնքել «Դելոյթ և Տուշ ԱՊՀ» փակ բաժնետիրական ընկերության հետ:
Այս առնչությամբ Արթուր Քոչարյանը նշեց, որ իրենք չեն պատրաստվում իշխանության հետ բովանդակային քննարկման մեջ մտնել. «Մենք պահանջ ենք դրել: Թե ինչ միջոցներով կանեն դա, նրանց խնդիրն է: Հիմա մենք չգիտենք, թե ինչ կազմակերպություն է, ինչ է: Պարզապես մինչեւ հիմա ժամկետներ չեն էլ նշել աուդիտի: Մենք էլ չենք նայելու իրենք ինչ են անում, ինչ չեն անում»:
Կարդացեք նաև
«Ոչ թալանին» նախաձեռնության անդամն ասաց, որ շուտով իրենք որոշակի քայլերի են դիմելու, որից հետո «իրենք խելքի կգան: Սեպտեմբերի 1-ից մենք իրենց խելքը իրենց գլուխը կհավաքենք»:
Աշոտ ԻՍՐԱԵԼՅԱՆ
