«Anadolu» գործակալության տեղեկացմամբ՝ Թուրքիայի նախագահ Ռեջեփ Թայիփ Էրդողանը խոսել է երկու թուրք նախկին դատախազների մասին, որոնք, ըստ թուրքական կայքերի տեղեկությունների, գտնվում են Հայաստանում: Նա ասել է, որ դատախազները Վրաստանից փախել են Հայաստան:
«Այնտեղից էլ ով գիտի ուր են փախչելու, դա այլ հարց է: Բնականաբար, մենք` թուրքական պետությունը, շարունակում ենք հետաքննությունը: Նրանք անպայման ինչոր մի տեղ կբռնվեն եւ գալով այստեղ վաղ թե ուշ հաշիվ կտան»,- մասնավորապես ասել է Էրդողանը:
Հիշեցնենք, որ օգոստոսի 11-ին նույն «Anadolu» գործակալությունը տեղեկացրել էր, որ պաշտոնանկ արված թուրք դատախազներ Զեքերյա Օզը եւ Ջելալ Քարան, որոնց ձերբակալելու որոշում է կայացվել, Վրաստանի տարածքով փախել են Հայաստան: Նմանատիպ պնդումով հանդես էր եկել Արդվինի նահանգապետ Քեմալ Ջիրիթը: Անվտանգության տեսախցիկների կողմից նկարահանվել է դատախազների փախուստի դրվագը:
Պատրաստեց Աշոտ ԻՍՐԱԵԼՅԱՆԸ
