Ըստ Թոխյանի` Սահմանադրական դատարանի 9 անդամները քիչ են, լավ կլիներ ավելացվեր անդամների թիվը մինչեւ 12
Սահմանադրական դատարանի անդամ Ֆելիքս Թոխյանը կողմնակից չէ խորհրդարանական կառավարման համակարգին, բայց Սահմանադրական փոփոխությունների նախագիծը գնահատում է պրոֆեսիոնալ աշխատանք:
Այսօր այդ մասին «Հայացք» ակումբում հրավիրած ասուլիսում նա նշեց, որ նախագծում Գերմանիայի Սահմանադրության մոդելն է օգտագործված. «Սա դասական Գերմանիայի մոդելն է: Մի հարցում վերցրել ենք Իտալիան՝ 89-րդ հոդվածն է: Մեր նախագծով երկրի տեր ու տիրակալը ԱԺ-ի կողմից հաստատված ծրագրի շրջանակներում դառնում է կառավարությունը, որը մշակելու եւ իրագործելու է երկրի ներքին եւ արտաքին քաղաքականությունը, լինելու է հաշվետու ԱԺ-ին: Բայց իշխանության իրական կենտրոնը փոխվում է դեպի կառավարություն, իսկ կառավարության ղեկավարը վարչապետն է, որը նախագծով շատ բարձր դիրք է ստանում եւ դառնում է համար մեկ անձը երկրի: Ինչ-որ տեղ մենք ստեղծում ենք կանցլերական պետություն՝ Գերմանիայի օրինակով»:
Կարդացեք նաև
Անդրադառնալով դատական իշխանությանը՝ Ֆելիքս Թոխյանն ասաց, որ առ այսօր դատական անկախ իշխանություն ՀՀ-ում չի կայացել, եւ շատ խնդիրներ են առաջացել, իսկ նոր նախագծով հեղափոխական փոփոխություններ են նախատեսվում. «Առաջինը դատական խորհրդի ստեղծումն է, որը լինելու է դատական իշխանության անկախության երաշխավորը, կազմված է լինելու 10 հոգուց: Դատարանների նախագահները ընդգրկված չեն լինելու կազմի մեջ: Բացի ՍԴ անդամներից, բոլոր դատավորները նշանակվելու եւ ազատվելու են դատական խորհրդի եզրակացության հիման վրա»:
Ինչ վերաբերում է Սահմանադրական դատարանին, այստեղ Ֆելիքս Թոխյանը հիմնավոր եւ մի մասն էլ՝ մտահոգիչ փոփոխություններ է տեսնում. «Ճիշտ եմ համարում, որ ավելացվել է քաղաքացիների՝ դեպի ՍԴ դիմումների ծավալը: Եթե մինչեւ հիմա մեզ կարող էին դիմել միայն օրենքի սահմանադրականության հարցով, այսօր ընդլայնվում է, եւ դա կարող է մեծ խնդիրների բերել: Մտահոգիչ է, որ ՍԴ-ն կարող է դիմումների հեղեղի տակ ուղղակի թաղվի»:
Նա ասաց, որ Գերմանիայում այդ խնդրից խուսափելու համար պետական տուրքը բարձրացրին, հետո ասեցին՝ միայն փաստաբաններով կարող են դիմել, դա էլ չօգնեց, հետո մտցվեց իրավունքի չարաշահման ինստիտուտը՝ ՍԴ-ն ինքն է որոշում՝ դիմումը եթե համարում է ակնհայտ անհիմն՝ քեզ տուգանում է, որ դու ինչ-որ դատարկություն ես բերել դատարան: Դա արվում է նրա համար, որ դիմումների հեղեղը կանխվի:
Ըստ Ֆելիքս Թոխյանի՝ այս ֆունկցիաները ՍԴ 9 անդամների համար շատ են, լավ կլիներ ավելացվեր անդամների թիվը մինչեւ 12:
Հռիփսիմե ՋԵԲԵՋՅԱՆ
