Սահակ Պողոսյանը կարծում է, որ Ռոբերտ Նիկողոսյանին պետք է արգելել ամենուր նկարել
Բազմաթիվ են դժգոհությունները Ռոբերտ Նիկողոսյան անունով երիտասարդի՝ Երեւանի տարբերի շինությունների վրա արված նկարների առիթով:
Մասնավորապես, արվեստագետ Սահակ Պողոսյանը Aravot.am-ի հետ զրույցում նշեց. «Դրանից սարսափելի բան ես իմ կյանքի ընթացքում չեմ տեսել, որը մատուցվում է որպես արվեստ: Ամենասարսափելին այն է, որ բազմաթիվ սիրողներ ունի, նկատել եմ տարբեր քոմենթներից: Մի քանի անգամ բարձրաձայնել եմ, այդ թվում՝ ֆեյսբուքում նույնիսկ մեկը ինձ պատասխանեց, ես էլ բացատրեցի, թե ինչ է խնդիրը: Այդտեղ նախ եւ առաջ շահարկում է տեղի ունենում մեր մտավորականության կամ ազգային արժեքների: Հայ մշակույթի վրա հետք թողած մարդկանց դիմանկարներն է արվում, եւ երբ բառացիորեն ասում ես՝ դա վատ է, իրենք արվեստը թողած անմիջապես սկսում են ազգայնականության դիրքերից խոսել, մշակութային առումով բանավեճ տեղի չի ունենում, իսկ ազգային առումով պաշտպանել մի բան, ամենասարսափելին է: Այդ նկարները բացարձակ արժեք չունեն, որովհետեւ մարդիկ անգամ Բենքսիին չեն տեսել: Սթրիթ արթը բողոք է հասարակության մեջ նեգատիվ երեւույթների նկատմամբ, իսկ այստեղ ոչ բողոք կա, ոչ գաղափար, ուղղակի շատ վատ, անճաշակ պորտրետներ են: Գոնե լավ նկարեին: Եվ եթե այդպիսի ցանկություն ունեին, թող անեին համաձայնեցված տարածքներում, ոչ թե հասարակական վայրերում, որովհետեւ այդ հասարակական վայրերի սպառողները նաեւ ես եւ դուք ենք, մյուսները, որոնք դեմ են դրան: Դա նույն է, որ հասարակական վայրում, կներեք, թքեն: Բոլորին չէ, որ դա դուր կգա: Եթե շատ ուզում են, թող իրենց տան պատերի վրա անեն եւ մարդկանց հրավիրեն իրենց տուն դա նայելու, մեզ չպարտադրեն»:
Կարդացեք նաև
Մեր հարցին՝ ի՞նչ է ակնկալում քաղաքային իշխանություններից, արվեստագետը պատասխանեց. «Դա նույնն է, որ ես հիմա անօրինական ծառ կտրեմ: Հիմա էդ մարդը անօրինական ինչ-որ մեկի պատին, տվյալ դեպքում քաղաքի սեփականության որեւէ կառուցի վրա, նկարում է: Թող արգելեն, ու էս արգելքի պատճառով էդ մարդը գնա , մտածի եւ իսկապես զբաղվի սթրիթ- արթով: Արգելքը իրեն կստիպի մտածել արգելքի դեմ, ստիպված կբարձրացնի իր ձայնը, ոնց որ Արտ-լաբորատորիան էր անում, կամ «Հակահարված» խումբը: Ի վերջո, իր արարքի համար ինքը պետք է պատասխան տա, երբեմն քրեորեն, որովհետեւ սթրիթ-արթը բոլոր դեպքերում պատասխանատվություն ենթադրող արվեստ է: Այն ինչ արվում է Երեւանի պատերին, չի կարելի գովել, նրան պետք է պատասխանատվության ենթարկել հասարակական վայրը կեղտոտելու եւ սերունդների ճաշակը փչացնելու համար»:
Երեւանի քաղաքապետարանից հետաքրքրվեցինք՝ արդյոք նկարների հեղինակն ունի՞ քաղաքային իշխանությունների համաձայնությունը՝ իր ցանկացած վայրում պատերին նկարելու համար: Լրատվականից պատասխանեցին, որ հանդիպում եղել է հեղինակի հետ, նրան առաջարկվել է նպատակահարմար վայրերում նկարել եւ ոչ թե ամեն տեղ: Նաեւ հավելեցին, որ հարցերի վերաբերյալ ավելի սպառիչ տեղեկատվություն կտրամադրի Երեւան քաղաքի գլխավոր դիզայները՝ արձակուրդից վերադառնալուց հետո:
Ռոբերտ Նիկողոսյանից էլ փորձեցինք մեկնաբանություն ստանալ՝ ֆեյսբուքյան նամակ ուղարկելով: Առայժմ պատասխան չենք ստացել:
Գոհար ՀԱԿՈԲՅԱՆ
Սահակ Պողոսյանի լուսանկարը՝ Գերման Ավագյանի:
Ռոբերտ Նիկողոսյանի լուսանկարները՝ Ֆեյսբուքից:
