Օգոստոսի 7-ից Հայաստանի նկարիչների միությունում ցուցադրվում են երկրաբան Սարգիս Հովելյանի աշխատանքները:
Ստեղծագործական ասպարեզը, որն ընտրել է Ս. Հովելյանը, կոչվում է ֆլորենտական խճանկար (մոզաիկա), սակայն երբ սկսել է աշխատել, գաղափար անգամ չի ունեցել, որ աշխարհում դեռևս հնագույն ժամանակներում գոյություն է ունեցել քարերի հետ աշխատելու այդ յուրօրինակ տեխնիկան:
Ֆլորենտական խճանկարն առաջացել է 16-րդ դարում Իտալիայում: Խճանկարի վարպետները գեղարվեստական պատկերն ստանում են գունավոր հղկված քարերից, որոնց բնական գույնն ու զարդանախշերը դառնում են պատկերի հիմնական միջոցը:
Հայ արվեստասերն առաջին անգամ է ծանոթանում Ս. Հովելյանի գործերին, քանի որ հեղինակը երբեք չի մտածել իր աշխատանքները ցուցադրելու, անհատական ցուցահանդես կազմակերպելու մասին:
Կարդացեք նաև
Հովելյանն այսօր լրագրողների հետ հանդիպման ժամանակ տեղեկացրեց, որ «Քարե ծիածան» խորագրով անհատական ցուցահանդեսում ներկայացված են 2009-2015 թթ. արված 39 աշխատանքներ:
Իր աշխատանքներում նա օգտագործում է ագաթ, հասպիս, կախալոնգ, քաղկեդոն, վանակաթ, թերթաքար, լաբրադորիտ այլ քարեր: Դրանք նա հավաքում է Հայաստանի տարբեր գյուղերից ու քաղաքներից՝ Իջևանից, Ջրվեժից, Ծաղկավանից, Արտենիից, Մեծավանից, Սևանից և այլն:
Քարերի մշակումը Հովելյանն իրականացնում է իր իսկ ձեռքով պատրաստած գործիքներով, կտրելու, հղկման ու փայլեցման իր մշակած տեխնիկայով:
Տարբեր երանգներով ու զարդանախշերով քարերի համադրությամբ են ստեղծվել «Սասունցի Դավիթ», «Հայկական այբուբեն», «Արարատ լեռը», «Շամիրամ», «Սեր», «Կատու», «Նռնենի», «Կարապներ», «Աստվածամայրը մանկան հետ» և այլ ստեղծագործություններ:
Հեղինակը դեռևս ոչ մի աշխատանք չի վաճառել. «Պատճառը, երևի, գինն է,- կարծում է նա,- բայց ես չեմ կարող այդ գործերն էժան վաճառել, որովհետև դրանք շատ ծանր աշխատանքի արդյունքում են ստեղծվում: Բնական քարեր վաճառող խանութներից մեկն առաջարկեց իմ աշխատանքներից իրենց մոտ դնել վաճառքի: Երկու նկար տվեցի, գինը՝ 400 հազար դրամ, հարցնողներ լինում էին, իսկ գնողներ՝ ոչ: Հայաստանում, ըստ երևույթին, մարդիկ չեն կարող իրենց թույլ տալ այդքան գումարով գնել ինչ-որ ֆլորենտական խճանկար, որի հեղինակը դեռևս անհայտ է»:
Հավելենք, որ ցուցահանդեսը բաց կլինի մինչև օգոստոսի 12-ը:
Սիրանուշ ՀԱՅՐԱՊԵՏՅԱՆ
