Իշխանական պատգամավորը`սահմանադրությամբ ընդդիմությանը տրվելիք լիազորությունները նոր մշակույթ է համարում
Իշխող ՀՀԿ-ի ներկայացուցիչ, ԱԺ պատգամավոր Գագիկ Մինասյանը շարունակում է պնդել, որ Սահմանադրության նոր տարբերակով քաղաքական փոքրամասնությանն էական լիազորություններ կտրվեն:
Խորհրդարանի նախագահի տեղակալներից մեկի ընդիմադիր լինելը, Վերահսկիչ հանձնաժողովի նախագահի պաշտոնը եւ ընդդիմությանը տրվելիք այլ առավելություններ նկատի ունենալով` նա կարծում էր. «Սա նոր մշակույթ է, որը բերելու է քաղաքական մեծամասնության ու փոքրամասնության համագործակցության»:
Կարդացեք նաև
Գագիկ Մինասյանը դրական է համարում նաեւ մեծամասնական ընտրական համակարգի վերացումը`հավելելով, որ այդ հարցի մասին տարիներ շարունակ հենց ընդդիմադիրներն են բարձրաձայնել:
Aravot.am-ի դիտարկմանը, որ իշխող ուժի ներկայացուցիչները փորձում են ցույց տալ, թե ընդառաջ են գնում ընդդիմությանը, սակայն, իրականում, ամեն ինչ արվում է, որպեսզի առաջիկա տասը տարիների քաղաքական գործընթացներն անցնեն բացառապես Մելիք-Ադամյան փողոցով, ինչպես դեռ անցած տարի հայտարարել էր ՀՀԿ խոսնակ Էդուարդ Շարմազանովը, Գագիկ Մինասյանը չհամաձայնեց:
«Իհարկե, ոչ: Խորհրդարանական փոքրամասնության դերակատարումը աննախադեպ մեծանում է ու առանց խորհրդարանական փոքրամասնության շատ էական որոշումներ հնարավոր չի լինելու կայացնել: Էլ չեմ ասում, որ քաղաքացիական հասարակությունը օրենսդրական նախաձեռնության իրավունք է ստացել»,- ասաց նա`հավելելով, որ գործող սահմանադրությունն իշխանության վերարտադրության համար ավելի մեծ հնարավորություններ է տալիս:
Իսկ այդ դեպքում ինչո՞ւ են ընդդիմադիրները դժգոհ՝ հարցին իշխանական գործիչը պատասխանեց. «Ընդդիմությունը ավելի հստակ պիտի ներկայացնի իր առարկությունները, որպեսզի ձեզ մոտ հարց չառաջանա, թե ինչո՞ւ են ընդդիմադիրները դեմ»:
Մեկ այլ հարցի`սահմանադրական բարեփոխումների գործընթացը կվերածվի՞ Հայաստանում իշխանափոխության, մանավանդ, որ առաջին նախագահ, ՀԱԿ առաջնորդ Լեւոն Տեր-Պետրոսյանը հայտարարել է աշնանն ակտիվանալու եւ ընդդեմ այս բարեփոխումների հանրությանը փողոց հանելու մասին, ՀՀԿ-ական գործիչն ասաց. «Ես չեմ բացառում, որ այդ տեսակետի կողմնակիցներ եւս լինեն, բայց բանը հեղափոխության չի հասնի»:
Ընդհանրապես, նա կարծում է, որ բոլորը պիտի հասկանան, որ իրենց տրվում է հնարավորություն`ընդունել մի օրենք, որն ավելի սահուն է դարձնում մեր երկրի կառավարումը, գոնե նախագահի եւ խորհրդարանի առաջնային մանդատների բացառմամբ:
Նելլի ԳՐԻԳՈՐՅԱՆ
