Արարատի մարզում գազալցակայանները փակվում են «պարտքերի ցուցակներով»
Aravot.am-ն ահազանգ է ստացել, որ Արարատի մարզում, մասնավորապես, Վեդի եւ Արարատ քաղաքաներում, վերջին երկու ամիսների ընթացքում մի քանի գազալցակայաններ են փակվել: Փակման պատճառը այն մեծ պարտքերն են, որոնք կուտակվել են բնակչության անվճարունակության պատճառով:
Մարդիկ, գազալցակայանի տիրոջ հետ համաձայնությամբ, իրենց մեքենաները պարտքով գազ են լցնում՝ պարտքը մաս-մաս մարելու պայմանով: Բայց հետագայում պարտքերը մեծանում են, ու նրանք ի վիճակի չեն լինում մարել այն: Արդյունքում, տանուլ են տալիս նաեւ գազալցակայանների տերերը, քանզի 5-6 միլիոն պարտքի ցուցակը ձեռքներին` կանգնում են փաստի առջեւ:
Մեր աղբյուրի փոխանցմամբ, այս համընդհանուր բարդ իրավիճակում բավական լավ են գնում ԱԺ նախկին ԲՀԿ-ական, այժմ ՀՀԿ խմբակցության պատգամավոր Կարո Կարպետյանին (Յուվեցի Կարո) պատկանող գազալցակայանի գործերը: Պատգամավորին պատկանող լցակայանը «նիսյայով» չի աշխատում:
Կարդացեք նաև
Aravot.am-ը փորձեց ՀՀ ՏԿ եւ ԱԻՆ պետական հրդեհային եւ տեխնիկականանվտանգության տեսչության հրդեհների հաշվառման, վերլուծության եւ հակահրդեհային քարոզչության բաժնի պետ Սերգեյ Հայրապետյանից ճշտել` համապատասխանո՞ւմ է վերջին երկու ամիսների ընթացքում Արարատի մարզում փակված գազալցակայանների մասին տեղեկությունն իրականությանը, ի՞նչ պատճառով են դրանք փակվում: Պարոն Հայրապետյանն արձակուրդում էր եւ ասաց, որ այս պահին տեղեկությունների չի տիրապետում:
Ի դեպ, պարոն Հայրապետյանի` «Արտակարգ թերթին» տրամադրած վերջին հաղորդագրություններից մեկի համաձայն, հունիսի 1-23-ն ընկած ժամանակահատվածում հանրապետության տարբեր մարզերի եւ Երեւան քաղաքի 173 ԱԳԼՃԿ-ում հայտնաբերվել են հրդեհային անվտանգության կանոնները չկատարելու կամ դրանք խախտելու դեպքեր: 158 գազալցակայաններ տուգանվել են 20-25 հազար դրամով: Ընդհանուր առմամբ` 10 մլն 385 հազար դրամ:
12 ԱԳԼՃԿ-ում հայտնաբերվել են տեխնիկական բնույթի անհամապատասխանություններ, 3 ԱԳԼՃԿ տուգանվել է 1-ական միլիոն դրամով` տեխնիկական անվտանգության փորձաքննություն չանցնելու համար:
Ի դեպ, մայիս ամսին նախկին պատգամավոր Հակոբ Հակոբյանին (Ճոյտ) պատկանող գազալցակայանում պայթյուն էր եղել տեխնիկական անվտանգության փորձաքննություն չանցնելու արդյունքում: Պայթյունի հետեւանքով զոհվեց Հակոբ Հակոբյանի եղբայրը, որդին հաշմանդամ դարձավ: Պայթյունից մեկ ամիս առաջ Հակոբ Հակոբյանին պատկանող գազալցակայանի տնօրինությանն էլ էին տուգանել մեկ միլիոն դրամով: Այդ դեպքից հետո ՏԿ եւ ԱԻՆ նախարար Արմեն Երիցյանն ասաց, որ հանրապետության բոլոր գազալցակայաններում խստացված ստուգումներ են իրականացնելու` անկախ նրանից, թե ո՞ր բարձրաստիճան պաշտոնյային են դրանք պատկանում:
Նելլի ԳՐԻԳՈՐՅԱՆ
