«Հանուն մարդկային կայուն զարգացման» ՀԿ ղեկավար, բնապահպան Կարինե Դանիելյանի տվյալներով, մոլորակի վրա էկոլոգիական խնդիրները գնալով խորանում են, և Հայաստանը դրանից անմասն չի մնում:
Նրա խոսքով, Հայաստանում բնապահպանական խնդիրների առումով ամենախոցելին Երեւանի կենտրոնն է:
«Ամեն օլիգարխ ուզում է Օպերայի վրա բիզնես կենտրոն ունենալ: Գետառը փակեցին: Գետառը մեծ կարևորություն ունի, ջրի ճանապարհը փակել ենք, երբ ուժեղ անձրև է լինում, բարձրադիր գոտիների բնակիչներն ահազանգում են ինձ, որ անձրևաջուրը կուտակվում է, հոսելու տեղ չունի»,- այսօր «Հենարան» ակումբում ասաց Կարինե Դանիելյանը:
Նա նկատեց, որ ի տարբերություն քաղաքապետարանի ենթակայության տակ գտնվող տարածքների, որոնք կանաչապատված ու խնամված են, քաղաքապետարանի վերահսկողությունից դուրս գտնվող վայրերում մտահոգիչ պատկեր է. «Օղակաձև այգին տեղ-տեղ չորանում է: Այն տրված է մասնավորին, ում միայն բիզնեսն է հետաքրքրում, ոչ թե կանաչ տարածքը: Ո՞ւր է այսօր Վարդան Մամիկոնյանի արձանի մոտ ժամանակին գործող կանաչ բարդիներով պուրակը, հիմա զվարճանքի վայր դարձել»:
Կարդացեք նաև
Տիկին Դանիելյանը նկատեց, որ տարիներով չի լուծվում բակերի կանաչապատման խնդիրը: Ըստ նրա, այդ գործը թաղապետարանները համատիրությունների վրա են գցում, համատիրությունները՝ թաղապետարանների:
Տիկին Դանիելյանը թվարկեց նաեւ անուններ, թե ովքեր պետք է պատասխանատվության ենթարկվեն Երևանի բնապահպանական այսօրվա վիճակի համար՝ Երևանի նախկին գլխավոր ճարտապետերը եւ մի քանի քաղաքապետեր:
Արփինե ՍԻՄՈՆՅԱՆ
