Ռուս բլոգեր Իլյա Վարլամովը գրել է, որ վերջին ամսվա ընթացքում Մոսկվայում բնակվող իր մի քանի ընկերներ կորցրել են աշխատանքը: Ոմանց կրճատել են, մյուսների բիզնեսներն էլ կործանվել են: Եվրոյի պաշտոնական կուրսը երեկ հասել է վերջին 5 ամիսների ամենաբարձր կետին եւ շարունակում է մոտենալ 70 ռուբլուն:
Ըստ բլոգերի՝ որոշ խաբեբաներ հասկացել են, որ ճգնաժամային իրավիճակում կարելի է գումար աշխատել եւ կազմակերպել են ոչ օրինական փոխանակումներ: Ուրիշ խաբեբաներ հետեւում են մոսկվաբնակներին, որոնք որոշել են փոխանակել մեծ գումարներ եւ վերցնում են դրանք:
Վերջին ամսվա ընթացքում Ռուսաստանում գողությունների թիվը երկու անգամ աճել է. մանրածախ առեւտրով զբաղվողների կորուստները արդեն հասել են 1 միլիարդ ռուբլու: Ամենաշատ գողությունները լինում են Մոսկվայում:
Ճգնաժամի պատճառով «ԱվտոՎազ» գործարանի թողարկած մեքենաները կրկին հայտնվել են Մոսկվայում ամենաշատը վաճառվող մեքենաների տասնյակում: Դա պատահել է այն պատճառով, որ մայրաքաղաքի աղքատ բնակիչները զանգվածաբար հրաժարվում են թանկ մեքենաներից: Ընդհանուր առմամբ 2015 թվականի առաջին կիսամյակին մեքենաների վաճառքը նվազել է 41,8%-ով:
Կարդացեք նաև
Մոսկվայի գլխավոր առեւտրային փողոցները 11,8%-ով դատարկվել են: Վարձակալողները մոլերում բողոքի ցույցեր են անում: Առեւտրային փողոցներից հետո դատարկվում են նաեւ A եւ B+ տեսակի գրասենյակները:
Ռուսաստանում անցած շաբաթվա ընթացքում նաեւ կտրուկ թանկացել է հնդկաձավարը եւ բրինձը: Փակվել են մի շարք հայտնի խանութներ եւ բանկերի մասնաճյուղեր:
Բլոգերը եզրակացրել է, որ հաշվի առնելով այս ամենը՝ մոտակա ժամանակներս ոչ մի լավ բան սպասել չի կարելի:
Պատրաստեց Աշոտ ԻՍՐԱԵԼՅԱՆԸ
