Ինչպես արդեն տեղեկացրել ենք, Կենտրոն եւ Նորք-Մարաշ վարչական շրջանների ընդհանուր իրավասության դատարանում (նախագահող՝ դատավոր Գագիկ Պողոսյան) «Վերնիսաժի» գործով հրապարակվեց դատահոգեբանական- դատահոգեբուժական փորձաքննության եզրակացությունը, որի համաձայն Գոռ Առաքելյանը մեղսունակ ճանաչվեց:
Ավարտվեց գործի դատաքննությունը: Մեղադրական եզրակացությունում առկա չէ հետազոտվող իրավիճակի վերաբերյալ Գոռ Առաքելյանի կողմից նկարագրվող որևէ տեղեկություն, ուստի այդպես էլ հնարավոր չէ պատասխանել նրա հոգեվիճակի վերաբերյալ եղած հարցադրումներին:
Aravot.am-ը Գոռ Առաքելյանի պաշտպան Երեմ Սարգսյանից հետաքրքրվեց՝ ի՞նչ ընթացք կստանա գործի քննությունը, դատախազը ետ կվերցնի՞ մեղադրանքը՝ հաշվի առնելով այն, որ Գոռ Առաքելյանի հոգեվիճակի վերաբերյալ իրենց պնդումները այդպես էլ չեն հաստատվել: Նա պատասխանեց. «Ես երբեք չեմ էլ վիճարկել մեղսունակությունը, որը կապված է հոգեկան հիվանդությունների հետ: Այդ առումով մեզ համար անակնկալ բան չկա: Եթե հաշվի առնենք այն հանգամանքները, որոնք մենք ենք նկարագրել փորձաքննության միջնորդության մեջ, միանշանակ այնպիսի տվյալներ ու հանգամանքներ են, որոնք ակնհայտորեն վկայում են աֆեկտի մասին: Սակայն փորձագետն առավելապես ցանկացել է հետազոտվողի պատմածն ու նրա հոգեկան ապրումները լսել, որի մասին տեղեկություն չունենալով, չի կարողացել որոշել առկա է աֆեկտը, թե՝ ոչ»:
Երեմ Սարգսյանը պնդեց, որ առկա մեղադրանքները բացարձակապես անհիմն են, մասնավորապես խուլիգանական դրդումները, շատերի կյանքի համար վտանգավոր եղանակ մարմնավորումը, միանշանակ անհիմն են: Նա վստահեցրեց, որ դա կհիմնավորի իր ճառով:
Կարդացեք նաև
Ըստ Երեմ Սարգսյանի՝ ամբողջ դատաքննությունը ցույց տվեց, որ միանշանակ պետք է վերանայումներ լինեն: Մեր այն դիտարկմանը՝ դատաքննությունն էլ ավարտվեց, բայց Վերնիսաժի գործի կծիկը չի բացվում, փաստաբանն արձագանքեց. «Կարծես թե ամբողջ դատաքննության ժամանակ հիմնավորումներ ենք ներկայացրել. և′ դեպքը, և′ պատճառները հիմնավորվեցին, բացի աֆեկտի հետ կապված խնդիրը, որը փորձագետը չկարողացավ բացահայտել: Հոգեկան խնդիրներ կան, ինչը չի հերքվում»:
Տաթև ՀԱՐՈՒԹՅՈՒՆՅԱՆ
