Ճանապարհին «Գազելը» շարքից դուրս եկավ
Այսօր, ժամը 12-ին Իջեւանի ավտոկայարանից դուրս եկած, Իջեւան-Երեւան ուղերթի «Գազելի» վարորդի աչքը ճանապարհին պարբերաբար «կպչում էր»: Միկրոավտոբուսի սրահի հետնամասում նստած իջեւանցի ուղեւորներից մեկը, ով Երեւանում«Սուպերմազ» մակնիշի բեռնատար է վարում, մեզ ասաց. «Աչքս վարորդի հայելուց չեմ կտրում: Նա մի քանի անգամ ղեկին քնեց»: Երիտասարդը մեզ հորդորեց վարորդին ուշադրության կոչ անել: Նշենք, որ երթուղային մեքենայի մեջ կային մանկահասակ երեխաներ:
Երբ երթուղային մեքենան մոտենում էր Աբովյան քաղաք տանող ճանապարհի հետ հատման վայրին` «Գազելի» վարորդը վազանց կատարեց, սակայն վազանց կատարող այլ մեքենա էր դուրս եկել երրորդ գիծ, ուստի «Գազելի» վարորդը փորձեց մեքենան վերադասավորել, կտրուկ իջեցրեց արագությունը, որի պատճառով միկրոավտոբուսի շարժիչի ծնկաձեւ լիսեռը կոտրվեց: Որոշ տարածություն երթուղայինը հաղթահարեց իներցիայի ուժով, հետո 60-ամյա վարորդը այլ միկրոավտոբուս հրավիրեց, որն ուղեւորներին անվճար Երեւան հասցրեց:
Ուղեւորներից մեկը` Իջեւանի տարածաշրջանի բնակիչ, մեզ հայտնեց,որ ինքը 2-րդ անգամ է երթեւեկում այդ վարորդի հետ, նախորդ անգամ «Գազելի» անիվն էր պայթել:
Կարդացեք նաև
Հավելենք, որ Իջեւան-Երեւան միկրոավտոբուսային ուղերթը սպասարկող ընկերության տերը Վարուժան Կարապետյանն է, ում Տավուշի մարզում «հերոս» են կոչում: Լիբանանի քաղաքացի Վարուժան Կարապետյանը 1985թ. Փարիզի Օռլի օդանավակայանում պայթուցիկ տեղադրելու համար, որի արդյունքում եղել են անմեղ զոհեր, դատապարտվել է ցմահ ազատազրկման: Մոտ 18 տարի Ֆրանսիայի բանտերից մեկում կրելով պատիժը` նա ներման է արժանացել, ապա ազատ արձակվելով` 2001թ. տեղափոխվել է Հայաստան:
Ոսկան ՍԱՐԳՍՅԱՆ
իսկ ինչ պակաս հերոսություն է անմեղ մարդկանց կյանքը վտանգի ենթարկելը????????????????? Իջեւանցիները կարող են մխիթարվել, որ Երեւանի երթուղայինները նման հերոսություններից անպակաս են