Այսօր Ազատության հրապարակում «Ոչ թալանին» շարժման անդամներն ու քաղաքացիական ակտիվիստները հանրային քննարկում էին կազմակերպել սահմանադրական բարեփոխումների եւ դրա դեմ հետագա քայլերի վերաբերյալ:
Դավիթ Սանասարյանի խոսքերով՝ իշխանություններն իրենց հայտնի տեխնոլոգիան են օգտագործելու. «Ճչացող կետեր են ներառում, որ հետո հանեն, ասեն՝ տեսեք, ժողովրդի պահանջն ենք կատարել: Ու Եվրոպային, ՌԴ-ին ցույց են տալու, որ տեսեք, ամեն ինչ նորմալ է: Իմ կարծիքով, քաղաքացիական հասարակությունն ընդհանրապես պետք է չմտնի քննարկումների մեջ, թող մասնագետները զբաղվեն ու տրամաբանական բոլոր մոտեցումները ներկայացնեն:
Կարդացեք նաև
Բայց մենք ուղղակի ասում ենք՝ ոչ, ոչ թե բոյկոտում: Եթե բոյկոտում ենք, ներսում վերահսկողությունը թուլանում է: Պետք է գնալ, քվեարկել ու թույլ չտալ, որ կեղծեն: Նախ` պետք է թույլ չտալ, որ օրակարգ մտնի, չկարողանան հանրաքվե անցկացնեն, որովհետեւ ընտրության մեխանիզմը գիտենք ինչ փուլում է»:
Նա առաջարկեց, որ բողոքի ալիքը մեծացնեն: Ակտիվիստներն ասում էին, որ պատրաստվում են Վենետիկի հանձնաժողովին նամակ գրել:
«Հայազն» կուսակցության անդամ Արմեն Հովհաննիսյանը ակտիվիստներին հորդորեց Վենետիկի հանձնաժողովի անունը հնարավորինս քիչ տալ. «Մեր քաղաքացու համար Սահմանադրությունը իր ինքնիշխանության դրսեւորումն է: Նա ասում է՝ ես այս երկրի տերն եմ, այսպես պետք է կառավարեմ: Եկեք մենք մեր ժողովրդին հնարավորություն տանք, որ ինքն իր իշխանությունը լիարժեքորեն այս երկրում արտահայտի, որ ասի՝ ոչ, դու չես կարող ինձ պարտադրել քո ուզած փոփոխությունները:
Վենետիկի հանձնաժողովի եզրակացությունները կարող է օգտակար են, բայց ես բառապաշարի մասին եմ խոսում: Եթե մենք կարողանանք Հայաստանի ընտրատեղամասերում այնպիսի վերահսկողություն սահմանենք մինչեւ նոյեմբեր, որ թույլ չտանք ընտրակեղծիքը, այդ ժամանակ կարող ենք քարոզել բոյկոտը: Բայց հիմա մենք պիտի այնպիսի մեխանիզմ մտածենք, որը առավելագույն արդյունք տա»:
Հիմնադիր խորհրդարանի անդամ Գեւորգ Սաֆարյանի խոսքերով՝ 25 տարի է՝ նույն ճանապարհով են գնում, քարոզչություն են անում, որ քաղաքացին իր ոչ-ը ասի, բայց ոչինչ չի ստացվում. «Առհասարակ մտածել, որ տոտալիտար ռեժիմը կարող է իրականացնել բարեփոխում, դա ծիծաղելի է: Դա չարեփոխում է ի սկզբանե: Դրա համար բայց ռեժիմն անհապաղ պետք է հեռացվի, որից հետո, եթե պետք է Սահմանադրություն փոխել, կփոխենք»:
Նա առաջարկեց երկու հարց դնել՝ Սահմանադրական փոփոխություններն ու այս ռեժիմի տապալումը:
Հռիփսիմե ՋԵԲԵՋՅԱՆ
