Այսօր հունահռոմեական ըմբշամարտի Հայաստանի ազգային հավաքականն ընդլայնված կազմով մեկնում է Բելառուս՝ «Ստայկի» մարզաբազայում մի քանի երկրների ընտրանիների հետ ուսումնամարզական հավաք անցկացնելու:
Մեր հավաքականը նախապատրաստվում է սեպտեմբերի սկզբին Լաս Վեգասում կայանալիք աշխարհի առաջնությանը, որտեղ մեդալներից բացի՝ խաղարկվելու են նաեւ 2016 թվականին Ռիո դե Ժանեյրոյում կայանալիք ամառային օլիմպիական խաղերի առաջին ուղեգրերը:
Երկշաբաթյա հավաքից հետո կվերադառնան Երեւան, կանցկացնեն եւս մեկ ուսումնամարզական հավաք, որի ավարտից հետո վերջնականապես հայտնի կլինեն Լաս Վեգաս մեկնող ըմբիշների անունները:
Հիշեցնենք՝ գլխավոր մարզիչ Լեւոն Ջուլֆալակյանը հայտարարել է, որ արվելու է ամեն բան օլիմպիական խաղերի ուղեգրերի առավելագույն քանակը՝ վեց վարկանիշ, նվաճելու համար:
ԱՇՈՏ ՀԱԿՈԲՅԱՆ
«Առավոտ» օրաթերթ
31.07.2015
