«Ոտքի՛, Հայաստան» նախաձեռնության անդամներին ոստիկանությունն այսօր դարձյալ թույլ չտվեց նստել Կառավարության շենքի աստիճաններին՝ պատճառաբանելով, որ այնտեղ նստելն անօրինական է։
«Օրվա ընթացքում տասնյակ պարսիկներ են գալիս նստում այս աստիճաններին, ուտում, խմում են… Դա օրինական է, մեր այստեղ նստելը ո՞չ»,- ի պատասխան՝ բողոքեցին ցուցարարները:
Մինչ վերջիններս բողոքում էին, նախաձեռնության համակարգող խմբի անդամ Դավիթ Սանասարյանը ևս մեկ անգամ կարողացավ ճեղքել ոստիկանական պատը և հասնել Հանրապետության հրապարակի «գորգին», սակայն ոստիկանները շուտով նրան դուրս բերեցին այնտեղից:
Երևանի փոխոստիկանապետ Վալերի Օսիպյանը Դավիթ Սանասարյանին հիշեցրեց նրա մեջքի վնասվածքի մասին. «Դավիթ Սանասարյան, բա որ կտրուկ շարժումներ ես անում, մեջքդ չի՞ ցավում»:
Կարդացեք նաև
«Ո´չ, բուժել են»,- պատասխանեցին ցուցարարները, իսկ Սանասարյանը, ըստ երևույթին, ոչինչ չլսեց, որովհետև բավականին հեռու էր կանգնած:
Հիշեցնենք, որ «Ոտքի՛, Հայաստան» նախաձեռնության հայտարարած 72 ժամն այսօր լրանում է, սակայն ցուցարարները՝ ոստիկանների հսկողությամբ, շարունակում են մնալ Հանրապետության հրապարակում:
Սիրանուշ ՀԱՅՐԱՊԵՏՅԱՆ
