«Քուրդիստան» կոմիտեի նախագահ, Քուրդիստանի համազգային կոնգրեսի պատգամավոր Ժենիկա Ղադըրի հավաստմամբ՝ քրդական աշխարհը ձգտում է հանգստության, իսկ թուրքական իշխանությունները չեն ցանկանում խաղաղություն, որովհետև խորհրդարանական ընտրություններում քրդական կուսակցության հաջողությունը խելագարության է հասցրել Էրդողանին:
«Սա քուրդ ժողովրդի դեմ թուրքական իշխանությունների պատերազմն է, և ճիշտ չեն թուրքական իշխանությունների այն հայտարարությունները, թե քրդական Ժողովուրդների դեմոկրատական կուսակցությունն է պատերազմ սանձազերծողը: Այս պատերազմը եղավ նրա համար, որ էրդողանը տանուլ տվեց պառլամենտական ընտրությունները և չկարողացավ հաշտվել այդ մտքի հետ: Դա նրան հասցրեց խելագարության աստիճանի»,- այսօր լրագրողների հետ հանդիպման ժամանակ այսպիսի տեսակետ արտահայտեց «Քուրդիստան» կոմիտեի նախագահը՝ նկատելով, որ այսօր խաղաղություն չէ պետք Էրդողանին. նա ձգտում է հասնել մենիշխանության, որը շատ ցավալի է. «Սակայն քուրդ ժողովուրդը չի նահանջի և կպայքարի ինչքան պետք է: Եթե նոր ընտրություններ էլ լինեն, Էրդողանն իր հավաքած ձայներն էլ կկորցնի»,- վստահեցրեց Ժենիկա Ղադըրը:
«Իսկապես, չի կարելի պատահական համարել այն, որ թուրքական իշխանությունները քուրդ ժողովրդի դեմ պատերազմ վերսկսեցին խորհրդարանական ընտրություններում քրդական Ժողովուրդների դեմոկրատական կուսակցության աննախադեպ հաջողությունից հետո,- հավելեց Հայաստանի քրդական ազգային խորհրդի նախագահ Կնյազ Հասանովը.- Մեջլիսում արդեն չեղավ միանձնյա ղեկավարում: Էրդողանի խաղաքարտերը խառնվեցին իրար, և նա ուզում է Սիրիայի քրդերի ու Թուրքիայի քրդերի միջև քաոս ստեղծել»։
Սիրանուշ ՀԱՅՐԱՊԵՏՅԱՆ
