Արեւի ճառագայթների ազդեցությունից մաշկի վրա եղած մանրէների մեծ մասը ոչնչանում է, բարձրանում է նյութափոխանակությունը:
Ուլտրամանուշակագույն ճառագայթները թեթեւակիորեն լայնացնում են մաշկի արյան անոթները` լավացնելով արյան շրջանառությունը։ Օրգանիզմի համար մեծ նշանակություն ունեցող մաշկային պիգմենտի պարունակությունն ավելանում է, քրտնագեղձերի եւ ճարպագեղձերի գործունեությունը` ուժեղանում։ Թառամած, անգույն եւ հատկապես չոր մաշկը թարմանում է, դառնում առաձգական, հարթ եւ առավել կայուն, իսկ շոկոլադի գույնի մաշկը մարմնին տալիս է առավել գեղեցիկ տեսք։
Արեւի ճառագայթներից պետք է օգտվել խելացիորեն։ Արեւի տակ երկարատեւ մնալու դեպքում, եթե դուք չեք կարողացել հարմարվել դրանց, կարող են առաջանալ գլխացավեր, գրգռվածություն, այրվածքներ, արեւահարություն եւ այլ բարդություններ։ Արեւային լոգանքներն առավել օգտակար են սարերում կամ ծովի մոտ։ Դրանց չի կարելի դիմել ուտելուց անմիջապես հետո կամ քաղցած։ Օդի ջերմաստիճանը պետք է լինի ոչ պակաս, քան 15-18 աստիճան: Ճառագայթահարումն առավել օգտակար է ժամը 9֊ի եւ 12֊ի միջեւ։ Ամառային շոգ օրերին չպետք է դիմել արեւային լոգանքների։ Ճառագայթահարումը պետք է սկսվի արեւի տակ հանված վիճակում մնալուց` սկսած 10-15 րոպեից` ամեն օր աստիճանաբար երկարացնելով մի քանի րոպեով։ Ավելի քան 2-3 ժամ տեւող արեւային լոգանքները օրգանիզմի համար օգտակար չեն եւ այն հյուծում են։ Նախքան ճառագայթահարմանն անցնելը` անհրաժեշտ է խորհրդակցել բժշկի հետ, քանի որ արեւային լոգանքներն ակտիվացնում են մի շարք հիվանդություններ։
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ» օրաթերթ
29.07.2015
