Հանրապետության հրապարակում գիշերը միջադեպ է տեղի ունեցել: Անհայտ անձը թանկարժեք մեքենայով կայանել է նստացույց իրականացնող քաղաքացիների մոտ, ավելի ուշ սկսել նրանց հայհոյել:
«Ոտքի Հայաստան» քաղաքացիական շարժման անդամ Անդրիաս Ղուկասյանն ապօրինի է համարում ցուցարարներին հայհոյած անձի գործողությունները. «Նրա գործողությունները համապատասխանում են քրեական օրենսգրքի 258 հոդվածի չորրորդ կետի հատկանիշներին, ակնհայտ խուլիգանական գործողություններ էին՝ հանրության դեմ բացարձակ ցինիզմով ուղղորդված: Այդ միջադեպի հետ կապված ոստիկանությունը տիրապետում է բոլոր տեղեկություններին, տեսել է մեքենայի պետհամարանիշը»:
Պարոն Ղուկասյանի խոսքով, չնայած միջադեպը տեղի է ունեցել ոստիկանների աչքի առջեւ, նրանք քայլեր չեն արել քաղաքացուն բերման ենթարկելու կամ կանխարգելելու նրա «հակահասարակական ու խուլիգանական» գործողությունները. «Այդ գործողությունը ուղղված էր ոչ թե ցուցարարների, այլ հանրության դեմ: Քաղաքացին հնչեցրեց հայհոյանքներ հայ ժողովրդին ու ոստիկանությանն ուղղված: Իմ իրավական գնահատականն այն է, որ այդ քաղաքացու գործողությունը գտնվում է ոստիկանության պատասխանատվության տիրույթում»:
«Ոտքի Հայաստան» քաղաքացիական շարժման անդամներն ունեն մի քանի գործողությունների տարբերակ, որոնք կիրառվելու են՝ կախված կառավարության վարքագծից:
Կարդացեք նաև
«Մեր պատկերացմամբ՝ հինգշաբթի օրը տեղի կունենա կառավարության բնականոն նիստ, որի ժամանակ պարզություն կմտցվի սակագնի հետ կապված՝ ինչ եղանակով ու ճանապարհով են նախատեսում կատարել փոխհատուցումներ: Այդ հարցից է կախված մեր հետագա քայլերի գործողությունների ծրագիրը»,- ասաց Անդրիաս Ղուկասյանը:
Նրա խոսքով, ոստիկանական անհամաչափ ուժերի կուտակումը Հանրապետության հրապարակում տեսանելի էր նստացույցի մեկնարկի առաջին օրը: Ըստ պրն Ղուկասյանի, իշխանությունները մեծ վտանգ են տեսնում այս ակցիաների մեջ ու անհամաչափ ուժի կիրառումն ապացույց է, որ իշխանության տեսանկյունից խնդիրը հրատապ է, եւ իշխանությունը վախենում է լայնածավալ զանգվածային բողոքներից:
Արփինե ՍԻՄՈՆՅԱՆ
