2015 թվականի յոթ ամիսների ընթացքում գրանցվել է օձից թունավորման 48 դեպք: Այս մասին հուլիսի 29-ին «Հայելի» մամուլի ակումբում լրագրողների հետ հանդիպման ընթացքում ասաց առողջապահության նախարարության գլխավոր թունաբան Միքայել Գաբրիելյանը:
Նա նշեց, որ անցած տարվա ընթացքում գրանցվել է օձից թունավորման 63 դեպք, որոնցից «Արմենիա» հանրապետական բժշկական կենտրոնում բուժվել է 15 հիվանդ, իսկ այս տարի՝ 12-ը: Միքայել Գաբրիելյանն ընդգծեց, որ թունավորման առումով ամենավտանգավոր վայրերն են Արարատյան դաշտը, Սիսիանը, Գորիսը, Կապանը, իսկ Երեւանում՝ Հրազդանի կիրճը:
«Ուղղակի պետք է զգույշ լինել, ինքը երբեք առաջինը չի հարձակվում, ինքը միշտ նախազգուշացնում է, ձայն է հանում, ֆշշում է, այդ պահին մեկ-երկու րոպե կանգնեք, առանց հարձակվելու ինքը կհեռանա»,- ասաց գլխավոր թունաբանը:
Միքայել Գաբրիելյանը նշեց, որ հիվանդը մինչեւ 6 ժամը ցանկալի է, որ ստանա առաջին ներարկումը եւ ինչքան շուտ, այնքան ավելի լավ: Առաջին օգնությունը հիվանդին անշարժացնելն է. «Անմիջապես դնել մեքենա, պատգարակ, եթե կա, հասցնել մոտակա հիվանդանոց: Նույն րոպեին բերանով արտածծել վերքից, բերանի խոռոչով թույնը չի տարածվում, չի ազդում: Այդ րոպեին, եթե դա արվի, մինչեւ 30 տոկոս թույնի ազդեցությունը պակասեցնում է: Կատեգորիկ չի կարելի ժգուտ դնել, ժգուտը մեկ է պետք է հանվի, իսկ դա կուտակվում է, հանելուց հետո հիվանդի մոտ միշտ խնդիր է առաջանում»:
Կարդացեք նաև
Ամի ՉԻՉԱԿՅԱՆ
