Քննչական կոմիտեի տարածած բացատրությունը հետեւյալն էր. «Նախաքննության ընթացքում ձեռնարկված քննչական եւ դատավարական գործողությունների արդյունքում ապացույցներ են ձեռք բերվել առ այն, որ Տ. Խաչատրյանը Գորիսի «Սդղի գյոլ» կոչվող տարածքում մայիսի 2-ին տեղի ունեցած վիճաբանության ժամանակ բռնություն է գործադրել Հարություն Զաքարյանի նկատմամբ՝ վերջինիս առողջությանը պատճառելով ծանր մարմնական վնաս»:
Մինչդեռ, դեպքից 2 օր անց՝ մայիսի 4-ին, համայնքների խոշորացման հարցով խորհրդարանական լսումների օրը Ազգային ժողովի միջանցքում լրագրողների հետ ճեպազրույցում, անդրադառնալով միջադեպին որդու մասնակցության վերաբերյալ հարցին, Սուրիկ Խաչատրյանն ասել էր. «Տիգրանը ստեղ ա, Տիգրանը Երեւանում ա, Տիգրանը ի՞նչ գործ ունի «Սդղի գյոլում» անելու, որ»:
Այս առնչությամբ հարցերին պատասխանեց ՀՀԿ խորհրդի անդամ, ՀՀ ԱԺ պետական-իրավական հարցերի հանձնաժողովի նախագահ Հովհաննես Սահակյանը։
– Նախաքննությամբ ապացույցներ են ձեռք բերվել, որ Տիգրան Խաչատրյանը մասնակցել է միջադեպին: Իսկ դեպքից 2 օր անց՝ Սուրիկ Խաչատրյանն ասում էր, որ նա Երեւանում է եղել։ Սա չի՞ նշանակում, որ մարզպետը ստել է: Այդ դեպքում՝ ՀՀԿ-ն չի՞ քննարկելու նման մարզպետին աշխատանքից հեռացնելու հարցը։
Կարդացեք նաև
– Ես չգիտեմ ինչ հանգամանքներում է եւ ինչի համար է Սուրիկ Խաչատրյանը ասել… Ես քրեական գործի նյութերին չեմ տիրապետում, հետեւաբար այստեղ որեւէ խնդիր չկա, ես չեմ կարող ընդամենը ձեր հարցադրման շրջանակներում փորձել որեւէ պատասխան հնչեցնել։ ՀՀԿ-ն հարցը չի քննարկել, բոլոր հանգամանքները կպարզի նախաքննությունը։
– Փաստորեն՝ ինչ-որ հանգամանքներում ՀՀԿ-ական մարզպետը կարող է հանրությանը սուտ տեղեկությո՞ւն ներկայացնել եւ կուսակցությունը դրան նորմա՞լ է վերաբերվում։
– Գիտեք, Սուրիկ Խաչատրյանը այսօր գործող մարզպետ է, ես չեմ կարծում, որ պետք է գնանք այդ ուղղությամբ եւ փորձենք առանց նյութերին, տվյալներին, տեղեկատվությանը ծանոթանալու ստախոս կամ մեկ այլ բան անվանել։ Ես կարծում եմ, որ դուք մի փոքր շտապում եք որակումներ տալու առումով, նախաքննությունը կավարտվի, դրա հետ կապված կունենանք ամբողջական տեղեկատվություն։
Սյուզաննա ՊՈՂՈՍՅԱՆ
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
