«Քաջարանի բժշկական կենտրոնում հիվանդների հեպատիտ C-ով վարակման պատճառը վիրաբուժական գործիքներն էին»,-անդրադառնալով Քաջարանի հիվանդանոցի հեպատիտ C-ով վարակվածության հայտնի դեպքին, այսօր «Պոստ Սկրիպտում» ակումբում ասաց «Նորք ինֆեկցիոն հիվանդանոցի» լյարդաբանական բաժանմունքի ղեկավար, Հայկական լյարդաբանական ասոցիացիայի նախագահ Հասմիկ Ղազինյանը:
Ըստ նրա, առաջին անգամ պետությունն իր վրա է վերցրել այս հիվանդների բուժումը. «Քաջարանի բուժկենտրոնում 15 հիվանդի մոտ ախտորոշվել է հեպատիտ C, որից 8-ի մոտ սուր հեպատիտ C: Այն արտահայտվել է դեղնուկային ձեւով, հեպատիտ C-ի դեպքում հազվադեպ է հանդիպում»:
Բոլոր հիվանդներն անվճար ստանում են հակավիրուսային բուժում. «Այն հիվանդները, որոնք ստանում են հակավիրուսային բուժում, մեծ հավանականություն կա, որ կբուժվեն, քանի որ այսօր հեպատիտ C-ն համարվում է բուժվող հիվանդություն: Հակավիրուսային բուժումը նշանակում է առողջացում»,-պարզաբանեց տիկին Ղազինյանը:
Մասնագետը խոստովանեց, որ հեպատիտով վարակման դեպքերը միայն Քաջարանի հիվանդանոցով չեն սահմանափակվում եւ պարբերաբար տարբեր հիվանդանոցներից սուր վիրուսային հեպատիտ C-ի դեպքեր են արձանագրվում. «Պատճառը հիմնականում վիրաբուժական մանիպուլյացիաներն են»:
Ըստ նրա, եթե մինչեւ 1992 թ-նը հեպատիտը փոխանցվում էր արյան փոխներարկման ճանապարհով, ապա արյան սքրինինգից հետո այդ ճանապարհով գրեթե դեպքեր չեն արձանագրվում: Փոխարենը հեպատիտները փոխանցվում են ատամնաբուժարաններից, գեղեցկության սրահներից, գինեկոլոգիական, կոսմետոլոգիական գործիքների միջոցով:
Լուսինե ԲՈՒԴԱՂՅԱՆ
