Ավելի քան յոթ տարվա ընդմիջումից հետո Հայաստանում կանցկացվի հեղինակային երգի փառատոն: Այն կազմակերպում են Բարդեր ակումբն ու Հայաստանի կոմպոզիտորների միությունը:
«Հուսո Առագաստ-2015» հեղինակային երգի փառատոնն անցկացվում է «Երգի փառատոն 2015» մեգանախագծի շրջանակում՝ երկու փուլով:
Այս մասին այսօր լրագրողների հետ հանդիպման ժամանակ տեղեկացրեց փառատոնի տնօրեն, հեղինակային երգի կատարող Վախթանգ Հարությունյանը:
Սևանում և Դիլիջանում անցկացվող «Հուսո առագաստ» հեղինակային երգի փառատոնն ի հայտ կբերի երիտասարդ հեղինակ-կատարողների, բեմահարթակ կտրամադրի նրանց՝ նպաստելով վերջիններիս ստեղծագործական գործունեությանը:
Կարդացեք նաև
Այսօրվանից բոլոր հայտատուները կարող են իրենց հայտերը ներկայացնել Հայաստանի կոմպոզիտորների միություն:
Փառատոնի գեղարվեստական ղեկավար Էդուարդ Զորիկյանի տեղեկացմամբ՝ տարիքային սահմանափակում չկա, չկա նաև կոնկրետ թեմա, որի շուրջ պետք է ներկայացվեն երգերը. դրանք ուղղակի պետք է լինեն հեղինակային երգի ժանրում. «Սա ոչ այնքան մրցույթ է, որքան հնարավորություն այն երիտասարդների համար, որոնք ներկայանալու հնարավորություն չունեն: Մենք նրանց հարթակ ենք տրամադրելու, ապահովելու ենք նրանց շփումն արդեն ճանաչված հեղինակային կատարողների, ինչպես նաև հեղինակային երգի երկրպագուների հետ»,- ասաց նա:
Փառատոնի առաջին փուլը կանցկացվի Սևանում՝ Շորժայի «Wishup» լողափում, հուլիսի 31-ից օգոստոսի 2-ը: Երկրորդ և հիմնական փուլը կանցկացվի օգոստոսի 26-28-ը՝ Դիլիջանում՝ Կոմպոզիտորների միության հանգստյան տանը:
Կազմակերպիչները փառատոնն անցկացնում են Երևանից դուրս, որպեսզի մշակութային իրադարձությունները չկենտրոնանան միայն մայրաքաղաքում:
Փառատոնին մասնակից լավագույն տասը հեղինակային երգի կատարողները Կոմպոզիտորների միությունում ձայնագրվելու հնարավորություն կունենան, այնուհետև Բարդերի ակումբը կբազմացնի սկավառակը հարյուր օրինակով և կտարածի:
Ի դեպ, Վ. Հարությունյանն ասաց նաև, որ վերջին՝ գալա համերգի հասույթն ուղղվելու է Դիլիջանում երաժշտական դպրոցի կիթառային դասարանի ձևավորմանը. «Փորձելու ենք մեկ տարի հովանավորել, որ այդ դասարանն աշխատի»,- նշեց նա:
Սիրանուշ ՀԱՅՐԱՊԵՏՅԱՆ
